О́tken 3 jeltoqsan kúni álemdegi eń úzdik aıaqdopshylarǵa beriletin «Altyn doptyń» ıesi anyqtaldy. Ol bar-joǵy tórt mıllıon turǵyny bar Horvatııa oǵlany, ıspanııalyq «Real» komandasynyń jartylaı qorǵaýshysy Lýka Modrıch.
«Bolashaqta ataqty bolý úshin baqytsyz balalyq qajet» dep qalamger E.Hemıngýeı aıtqandaı, Lýka aýzynan emshek súti keppeı jatyp, soǵystyń soıqanyn kórip, ot keship úlgerdi. Ol alty jasqa aıaq basqan 1991 jyly arqasúıer Sner atasynan aıyryldy. Bir-eki bas malyn qaıyryp júrgen qarııany serbııalyq jasaqtar atyp ketip, bul náýbetten tiri qalǵandar qara bastaryn saýǵalap, portty shahar Zadarǵa taban tiredi. Sol bir kúńirenisti kúnder jaıly Lýka Modrıch, «ystyq tabaǵa qarylyp, qyzyl shoqqa úıtilgendeı» kúıde boldyq dep eske alypty. О́ıtkeni, teńiz jaqtan zirkireı atylǵan zeńbirek oqtary men tas tóbeden jańbyrdaı jaýǵan bombalardan aman qalý úshin horvatııalyqtar sát saıyn ajalmen arpalasyp jaty.
Qyzyq. Qalyń el qıraǵan qurlystyń jyrtyq-tesigine tyǵylyp, qý janyn qoıarǵa jer tappaı júrse, qulaǵy qalqıǵan kúzgi qaıyńnyń japyraǵyndaı sary bala oq pen ottyń astynda asyr salyp dop teýip júr. Ajal onyń esinen shyǵyp ketken, álde jankeshti dop qumarlyǵy úshin aınalyp ótip jatyr... Lýka osylaı er jetti.
2008 jyly aǵylshyndyq «Tottenhem Hotspýr» fýtbol komandasymen sharttasqan sátinde Lýka alǵash ret kópshilikke til qatyp, «soǵys meni erte eseıtti, ashtyqtan buralyp júrsem de dopty bir sát tastamadym. Jilinshigimdi qorǵaıtyn qatty kardon qaǵazǵa Brazılııa fýtbolshysy Ronaldanyń sýretin salyp alýshy edim... Sol bir aýyr kúnderdi ekinshi qaıta eske alýdy qalamaımyn» degeni el esinde.
Modrıchtiń aıaqdopshy retindegi alǵashqy qadamyn ashyp bergen bapkeri Baljo aıtady: bir kúni tanysym habarlasty. Ol avtokeshendi bekettiń qyzmetkeri-tin. Onyń aıtýynsha japyraqtaı sary bala kelip, alańqaıda kúni-túni dop tebedi. Sheberligi keremet. Kelip kórshi, dedi. Bardym. Kórdim. Tańqaldym. Qolma-qol ata-anasyna habarlasyp. Jetim burysh jaǵalap júrgen olarǵa stadıonnyń irgesinen turýǵa jaraıtyn baspana taýyp berdim. Soǵys júrip jatyr. Bir top balany jattyqtyram. Oıda-joqta aspannan kúrs etip bomba qulaıdy. Balalar kózdi ashyp-jumǵansha asa jyldamdyqpen alańdy tastap shyǵýy qajet. Birinshi bolyp shyqqan balaǵa «Sol kúnniń batyry» ataǵy beriletin. «Batyr» ataǵyn eń kóp alǵan kishkentaı Lýka.
Batys basylymdary «Lýka Modrıchtiń baǵyn ashqan – Tomıslav Basık» dep jazyp jatyr. Oqıǵa bylaı bolypty: Lýka qansha sheber bolsa da, eshkim qatarǵa qosa qoımaǵan. Sebebi, tym názzik, ári boıy alasa. Tek bir adam ǵana úmit úzbegen. Ol – Basık bapker. Aqyry shákirtin ataqshy fýtbolshy etip shyǵarǵan. Sondyqtan bolar bul adamdy Lýka «ekinshi ákem» dep ataıdy. 2014 jyly aqpan aıynda T.Basık dúnıeden ótkende shákirtiniń etegi jasqa toldy. Úsh aıdan keıin Lýka Modrıch Chempıondar Lıgasynyń qalqan qulaq kýbogyn qushaqtap turyp, «Basık ustazym mende bári bar, tek sen joqsyń» dep aıǵaı saldy. О́z oıym aıtady: Lýka ótken jazdaǵy fýtboldan álem birinshiliginde komandasyn ógiz kúshimen órge súırep, kúmis medaldyń shetin tistetip, ózi chempıonattyń «Úzdik oıynshysy» ataǵyn alǵan sátinde de eshkimge estirtpeı taǵy da osylaı aıǵaı salǵan shyǵar.
Beken QAIRATULY,
«Egemen Qazaqstan»