Jympıty aýylynda atty ertteý jáne atqa miný mádenıeti taqyrybyna jastarǵa arnalǵan sheberlik saǵaty ótti. Erekshe «dáristi» dástúrli ánshi, dástúrli «Jigit sultany» baıqaýynyń birneshe márte jeńimpazy, shabandoz Sálimjan Áýbákirov júrgizgen.
«Nur Otan» partııasy Syrym aýdandyq fılıaly jáne aýdandyq máslıhat depýtaty Serik Toqmámbetovtiń uıymdastyrýymen ótken sharanyń maqsaty – Elbasy Nursultan Nazarbaevtyń «Uly dalanyń jeti qyry» atty maqalasynda kóterilgen atqa miný mádenıetin jańǵyrtý máselesine ún qosý.
Sheberlik saǵatyna qatysqan Syrym aýdandyq kolledji stýdentteri, Jahansha Dosmuhameduly jáne Qadyr Myrzalıev atyndaǵy mektep oqýshylary at ábzelderi ataýlarymen tanysyp, atty durys ertteý jáne bosatý jóninde dáris aldy. Kóshpelilerdiń myńjyldyq tájirıbesin kózben kórip, qolmen ustap, tipti ózderi tájirıbe júzinde jasap ta kórdi. Al atqa minýdiń yńǵaıy, onyń kútimi men baby týraly Syrym aýdandyq máslıhatynyń depýtaty Serik Toqmámbetov keńirek aıtty.
− Jınalys jasap, baıandama oqýmen jastarǵa rýhanı tárbıe bere almaımyz. Olarǵa ózimiz naqty ispen úlgi kórsetýimiz kerek! Sheberlik saǵaty jastarǵa paıdaly boldy dep esepteımin. Dástúrli sharýashylyqty jańǵyrýdy udaıy júzege asyrýǵa nıettimiz, – deıdi shara týraly «Nur Otan» partııasy Syrym aýdandyq fılıaly tóraǵasynyń birinshi orynbasary Talǵat Darǵojıev.
− Atqa miný mádenıetin aldaǵy ýaqytta buqaralyq sporttyq sharalardyń biri retinde de qoldanǵan jón. Memlekettik mereke qurmetine velosherý, avtosherý ótkize bergenshe, bir kezek salt attylar sherýin de ótkizýge bolatyn sekildi, – deıdi jympıtylyq áriptesimiz Baýyrjan Shırmedınuly.
Qazbek QUTTYMURATULY,
«Egemen Qazaqstan»
Batys Qazaqstan oblysy