О́ńir basshysy Qumar Aqsaqalov ákimdiktiń otyrysynda jyl qorytyndysyn jarııa etti.
«2018 jyl oblys úshin este qalarlyqtaı jemisti qorytyndylandy deýge tolyq negiz bar. Qoldaǵy málimetterge súıensek, oblys ekonomıkasy kóterilip, halyqtyń áleýmettik jaǵdaıy jaqsarǵanyn baıqaýǵa bolady. Qazaqstan men Reseı Prezıdentteriniń qatysýymen ótken XV óńiraralyq yntymaqtastyq forýmyn erekshe atap ótkim keledi. Memleket basshysynyń tapsyrmasy boıynsha aımaqtyń áleýmettik-ekonomıkalyq damytýdyń 2019-2021 jyldarǵa arnalǵan keshendi josparynynyń qabyldanýy-mańyzdy oqıǵalardyń biri», dedi Qumar Irgebaıuly.
Oblys ekonomıkasy turaqty damyp keledi. Aýyl sharýashylyǵy ónimderin óndirý kólemi 2,1, qurylys jumystary 3,7, ónerkásip óndirisi 1, ortasha aılyq eńbekaqy 6,8 prosentke ósti. Qazaqstannyń aýyl sharýashylyǵyna salynǵan ınvestısııanyń tórtten biri oblysqa tıesili. Agroónerkásip keshenindegi sıfrlandyrý, ozyq tehnologııalardy qoldaný, mıneraldyq tyńaıtqyshtardy engizý nátıjesinde aýyl sharýashylyǵy ónimderi 544,2 mırlıard teńgege jetti.
Eksporttyq áleýettiń artqany baıqalady. On aıda eksport 19,5 prosentke molaıyp, ımport kerisinshe 10,2 prosentke tómendedi. 2200 bas sıyrǵa arnalǵan tórt taýarly-sút kesheni paıdalanýǵa berildi. 200 jańa jumys orny ashylyp, 3,3 mıllıard teńgeniń sıfrlandyrý elementteri engizildi.
Indýstrııalyq-ınnovasııalyq damýdyń memlekettik baǵdarlamasynyń ekinshi besjyldyǵynda jalpy somasy 1,2 mıllıard teńge bolatyn bes joba júzege asyrylýda. Ishki jalpy ónimindegi orta jáne shaǵyn bıznestiń úlesi bıyl 25,4 prosent boldy. Ony 30 paıyzǵa jetkizý kózdelgen. “Bıznestiń jol kartasy – 2020” baǵdarlamasynyń 2025 jylǵa deıin uzartylýy jańa 3 myń jumys ornyn ashýǵa, salyq bazasyn 8,5 prosentke ósirýge, 80 mıllıard teńgeniń ónimin shyǵarýǵa múmkindik beretin bolady.
1600 otbasy jańa qonysqa kóshti. Bıýdjettik mekemelerdiń 43 myń jáne ekonomıkanyń naqty sektoryndaǵy 101,6 myń qyzmetkerdiń jalaqylary ósiriledi. Bes áleýmettik bastama aıasynda shaǵyn jáne orta bıznes sýbektilerine nesıe bólý 2,8 mıllıard teńgege jetti.
Aımaq basshysynyń aıtýynsha, áleýmettik-ekonomıkalyq damytýdyń keshendi josparyna sáıkes aldaǵy jyldary bolashaǵy bar 302 eldi mekende 3000 turǵyn úı paıdalanýǵa berilmek. Petropavl qalasynda 635 eski úı súrilip, eki myńnan astam páter, áleýmettik nysandar salyndy. Jańadan “Jas О́rken” men “Solnechnyı” shaǵynaýdandary boı kóterdi.
О́mir ESQALI,
«Egemen Qazaqstan»
Soltústik Qazaqstan oblysy