Oblys ákimi bir top qyzylordalyq sportshylarmen kezdesip, olarǵa páter kiltteri men aqshalaı sertıfıkattar tabys etti.
Argentınanyń Býenos-Aıres qalasynda ótken III jasóspirimder olımpıadasynyń jeńimpazy Dıas Bahraddın men paradzıýdo boıynsha alǵashqy qazaqstandyq álem chempıony Oljas Orazalyuly jańa páterlerdiń kiltin aldy.
Kezdesýge III jasóspirimder olımpıadasynyń jeńimpazy Dıas Bahraddın, paradzıýdo boıynsha álem chempıony Oljas Orazalyuly, sondaı-aq dzıýdodan Para Azıadanyń kúmis júldegeri - Azamat Turymbetov, grek-rım kúresinen Álem chempıonatynyń qola júldegeri - Aıdos Sultanǵalı jáne baıdarka men kanoe esýden Azııa oıyndarynyń qola júldegeri - Mereı Medetov jáne otyryp oınaý voleıbolynan Para Azııa oıyndarynyń qola júldegerleri - Erık Qasqabaev, Shyńǵys Medeýov jáne Almat Manabaev qatysty.
«Bıyl oblys sportshylary álemdik arenalarda kóptegen joǵary tabystarǵa qol jetkizip, Táýelsiz Elimizdiń mártebesin asqaqtatýda. Oblysymyzda buqaralyq sport, joǵary sport sheberligi, ulttyq sportpen qatar múmkindigi shekteýli sportshylar arasynda da sport qarqyndy damyp keledi. Portýgalııanyń Odıvelash qalasynda paradzıýdodan ótken Álem chempıonatynda Qazaqstan quramasyna jalǵyz altyn medaldi qyzylordalyq Oljas Orazalyuly alyp berdi. Bul jeńis – Qazaqstan Paralımpııa sporty tarıhyndaǵy alǵashqy medal bolyp sanalady. Sizderdiń jetken jetistikterińiz - óskeleń urpaqtyń patrıottyq sezimin kúsheıtip, myńdaǵan jastyń sportqa, salaýatty ómir saltyna yntasyn arttyrary sózsiz. Sizder bizdiń elimizdiń halyqaralyq sporttaǵy mártebesiniń joǵary ekendigin dáleldep, jattyqtyrýshylar men jankúıerlerdiń ǵana emes, barsha qazaqstandyqtardyń úmitin aqtadyńyzdar»,-dedi oblys ákimi.
Kezdesýde sportshylar atynan Dıas Bahraddın, Aıdos Sultanǵalı jáne Erık Qasqabaev oblys ákimine qoldaý kórsetkeni úshin alǵys aıtty.
Baqtııar TAIJAN,
«Egemen Qazaqstan»
Qyzylorda oblysy