Oral qalasynda túngi sotta 20 kún ishinde 62 ákimshilik is qaraldy dep habarlaıdy Batys Qazaqstan oblystyq sotynyń baspasóz qyzmeti.
Oral qalasynyń mamandandyrylǵan ákimshilik soty «Túngi sot» pılottyq jobasy júzege asyrylyp jatqan 20 kún ishinde 62 ákimshilik is qaraǵan. Bul isterdiń 15-i – otbasylyq jáne turmystyq qatynastarǵa, al 38-i – jol-kólik oqıǵasyna qatysty eken.
- Sondaı-aq qaralǵan isterdiń ishinde usaq buzaqylyq, júrgizýshiniń kólikti mas kúıde basqarýy sekildi faktiler de bar, – deıdi Batys Qazaqstan oblystyq sotynyń baspasóz hatshysy Elmıra Esenǵalıeva.
Ákimshilik quqyqbuzýshylyqtar boıynsha is júrgizý rásimderin jeńildetý, máselelerdi qysqa ýaqyt ishinde sheshý, sot daýyn taraptardyń jumys ýaqytynan bólek, ıaǵnı keshki mezgilde sheshý arqyly olardyń ýaqytyn únemdeý sekildi ıgi nıetten týǵan «Túngi sot» jobasy Aq Jaıyq óńirinde de qanatyn jaıyp keledi. Oralda keı kúnderi keshki saǵat 18-den 22 saǵatqa deıin qaralǵan isterdiń sany 12-ge jetti. Jalpy orta eseppen kún saıyn 3-6 is túnde qaralady. Árıne, sot ákimshilik quqyq buzýshylyq isterdi qaraý kezinde medıasııa ınstıtýtyn da keńinen qoldanyp otyr. Máselen otbasylyq jáne turmystyq qatynastar salasyndaǵy qaralǵan 9 quqyqbuzýshylyq is taraptardyń tatýlasýyna baılanysty toqtatylǵan.
Qazbek QUTTYMURATULY,
«Egemen Qazaqstan»
Batys Qazaqstan