Aýstralııanyń Sıdneı qalasynda ótip jatqan tennısten Sydney International týrnırinde Iýlııa Pýtınseva jarystyń 1/8 kezeńine joldama aldy. Týrnırdiń júlde qory 823 myń AQSh dollaryn quraıdy.
Halyqaralyq dodany irikteý kezeńinen bastaǵan otandasymyz negizgi kezeńniń birinshi aınalymynda jergilikti tennısshi, álemniń 34-raketkasy Darıa Gavrılovamen kúsh synasyp, eki set qorytyndysy boıynsha jeńiske jetti. Alǵashqy sette Pýtınseva esh qıyndyqsyz 6:1 esebimen basym tússe, ekinshi sette biraz ter tógýge týra keldi. Jarys óz elinde ótip jatqan soń Gavrılova namysqa tyrysyp, Iýlııamen biraz ýaqyt taıtalasyp baqty. Degenmen, bul sette de otandasymyz 7:6 esebimen jeńiske jetti.
Endi Iýlııa Pýtınseva Sydney International týrnıriniń 1/8 kezeńinde Sloan Stıvens (5) pen Ekaterına Aleksandrova (72) jubynyń jeńimpazymen oınaıtyn bolady.