Astana Elbasynyń bastamalarynyń júzege asýy jáne memlekettiń táýelsizdiginiń sımvolyna aınaldy, dep habarlaıdy elorda ákimdiginiń resmı saıty.
Búgin Astana ákiminiń tóraǵalyǵymen 2018 jyldyń qorytyndysy jáne 2019 jyldyń josparyna arnalǵan qala aktıvimen keńeıtilgen apparattyq keńesi ótip jatyr. Keńeste Baqyt Sultanov astananyń 20 jyl ishindegi basty jetistikteri týraly aıtty.
«20 jyl ishinde Astana Elbasynyń bastamalarynyń júzege asýy jáne memlekettiń táýelsizdiginiń sımvolyna, Qazaqstannyń qoǵamdyq-saıası jáne mádenı ómiriniń ortalyǵyna aınaldy. Atalmysh kezeńde qala aýmaǵy 3 esege, qurylys kólemi 19 esege, turǵyndar sany 4 eseden asa joǵarylady (1997 j – 300,5 myń adam, 2018 j – 1065,9 myń adam). Eger 20 jyl buryn ortasha jalaqy quny 10 myń teńgege de jetpese, qazirgi kezde 230 myń teńgeden joǵary. Jumyssyzdyq deńgeıi 1998 jyldan beri 12,8%-dan 4,5%-ǵa azaıdy, bul respýblıka boıynsha eń tómengi kórsetkish bolyp tabylady», - dedi B.Sultanov. «Osy jyldarda áleýmettik ınfraqurylymnyń aýqymdy qurylystyq baǵdarlamasynyń nátıjesinde 20-dan asa respýblıkalyq jáne qalalyq densaýlyq saqtaý mekemeleri, 300-den asa balabaqsha men mektepter salyndy», - dep jalǵastyrdy B.Sultanov.
Astananyń jalpy turǵyn qory 20 jyl ishinde 4 eseden artyq joǵarylap, 20 mln sharshy metrden asty (1998 j – 4,9 mln sharshy metr), onda kommersııalyq qurlysshylardyń da úlesi bar, olardyń arqasynda Astana sapaly turǵyn úımen qamtamasyz etý deńgeıi boıynsha ulttyq kóshbasshyǵa aınaldy. Sonymen qatar, qala ákimi Astananyń elimizdiń ekonomıkalyq potensıalynda erekshe ról oınaıtynyn eske saldy. Bunda respýblıkanyń jalpy ishki óniminiń 11%-dan kóbi óndiriledi, memlekettiń negizgi kapıtalyna ınvestısııanyń 10% qurylady, turǵyn úıdiń 23%-dan astamy enedi.
«Biz munaı jáne ónerkásiptik óńirge jatpaımyz, sondyqtan da biz negizgi basymdyqty ınnovasııanyń damýy men bızneske ıek artamyz. Basqasha aıtqanda, qala ekonomıkasynda orta jáne shaǵyn kásipkerliktin úlesi arta túsedi. Ol búginniń ózinde el boıynsha rekordtyq jáne qala ekonomıkasynda 58,5% - dan assa ósti», - dedi B. Sultanov.