Aýǵanstanda qýatty jarylys saldarynan 4 adam qaza taýyp, 90-ǵa jýyǵy jaraqat aldy.
Aýǵanstan Ishki ister mınıstrliginiń habarlaýynsha, 14 qańtar kúni keshke mınalanǵan júk kóligi jarylǵan. Qaza bolǵandardyń úsheýi áskerı qyzmetshi, bireýi azamattyq tulǵa bolǵan.
Zardap shekkenderdiń basym kópshiligi qarapaıym turǵyndar. Resmı málimetterge súıensek, jaraqattanǵandar arasynda 23 bala men 12 áıel bar.
El prezıdenti Ashraf Ganı shabýyldyń ıslamǵa qarsy baǵyttalǵanyn atap ótti. Prezıdenttik saraıdyń málimdemesinde A.Ganı tıisti organdarǵa shabýyldy jiti tergeýdi jáne zardap shekkender men qaza bolǵandardyń otbasylaryna qol ushyn berýdi tapsyrǵan. Bul týraly Tolo News saıty jazdy.
Aıta keteıik, jarylys Aýǵanstan astanasy Kabýldyń shyǵys bóliginde boldy. Onda kommersııalyq emes uıymdardyń keńseleri, turǵyn úıler men sheteldik azamattar jıi baratyn demalys oryndary ornalasqan.