Oral qalasyndaǵy №31 jáne №33 mektep ǵımarattary, Aqjaıyq aýdanyndaǵy Abaı atyndaǵy gımnazııa, Mahambet О́temisov atyndaǵy orta mektep jáne Qaztalov aýdanyndaǵy Alma Orazbaeva atyndaǵy orta mektep ǵımaraty apat jaǵdaıynda tur. Batys Qazaqstan oblystyq bilim basqarmasynyń basshysy Sholpan Qadyrova bıyl Chapaev pen Qaztalov aýyldarynda jańa mektep qurylysy bastalatynyn aıtady.
2018 jyly oblysta bilim salasynda 7 ǵımarat jańadan salynyp, paıdalanýǵa berildi. Onyń tórteýi – orta mektep ǵımarattary. Máselen, Oral qalasyna qarasty Derkól kentinde 600 oryndyq, Zashaǵan kentinde 900 oryndyq mektep salynsa, Aqjaıyq aýdanynyń Shabdarshap aýylynda 198 oryndyq mektep ǵımaraty, Báıterek aýdany Darııan aýylynda 300 oryndyq mektep 100 oryndyq ınternatymen birge salynyp, qazir sabaq júrip jatyr.
Buǵan qosa Bókeı ordasy aýdanynyń ortalyǵy Saıqyn aýylynda 70 oryndyq ınternat, Qaztalov aýdany ortalyǵynda saz mektebi, Aqsaı qalasynda 240 oryndyq balabaqsha paıdalanýǵa berilgen.
Terekti aýdanynyń Sary О́mir aýylynda 48 oryndyq saýyqtyrý lageri ǵımaratynyń qurylysy jalǵasýda.
Oral qalasyndaǵy memlekettik tilde bilim beretin mektepterde oryn tapshylyǵy seziledi. Máselen, 2018-2019 oqý jylynyń basynda 5 úsh aýysymdy mektep bolǵan. 2018 jyldyń sońynda Sarytaý shaǵyn aýdanynda 900 oryndyq №50 mektep paıdalanýǵa berilip, úsh aýysymdy mektep sany sál azaıdy. Degenmen, kópqabatty turǵyn úı qurylysy qarqyndy júrip jatqan Zashaǵan kentine áli birneshe mektep kerek. Sholpan Qadyrova osy aýdanda №51 mektep qurylysy bastalatynyn habarlady.
Qazbek QUTTYMURATULY,
«Egemen Qazaqstan»
Batys Qazaqstan oblysy