Qarjylyq saýatsyzdyq pen salǵyrttyqtyń saldary talaıdyń basyn tasqa urǵyzdy. Búginde jurtshylyq budan durys sabaq ala bastaǵandaı. Sońǵy jyldary halyqtyń qarjylyq saýattylyqqa degen umtylysy edáýir ulǵaıyp keledi. Bul rette ekonomıkaǵa belsendilik tanytatyn azamattardy aqparattandyrýǵa arnalǵan iskerlik basylymdardyń mańyzy zor.
Otandyq iskerlik BAQ naryǵynda 17 jyldan beri úzdiksiz jumys istep kele jatqan «Kýrsıv» gazeti qarjy, ekonomıka taqyrybyndaǵy saýatty saraptamalyq maqalalarymen kórinip júrgen irgeli ujym dep aıtýǵa bolady. Júrgizilgen zertteý boıynsha, basylymnyń saıtyn búginde aıyna 1,3 mıllıonnan astam adam oqıtyny anyqtalǵan. Budan bylaı Otandyq oqyrmandar úshin iskerlik jýrnalıstıkadaǵy álemniń úzdik basylymynda basylǵan bıznes pen qarjy salasyndaǵy úzdik maqalalardy oqýǵa múmkindik týyp otyr. Bulaı deıtinimiz, «Kýrsıv» gazetiniń quryltaıshysy Alteco Partners JShS-i álemdik medıanaryqtaǵy ekonomıka taqyrybynyń sardary sanalatyn The Wall Street Journal gazetimen kommersııalyq negizdegi seriktestik-baılanysyn bastaǵanyn málimdedi.
Seriktestik aıasynda «Kýrsıv» gazetinde jáne kursiv.kz saıtynda apta saıyn The Wall Street Journal basylymynan iriktep alynǵan maqalalar orys tilinde usynylady. Osylaısha The Wall Street Journal jergilikti oqyrmandar úshin óziniń maqalalaryn aýdarýǵa jáne jarııalaýǵa da jol ashyp otyr. Qazaqstandyq gazet bedeldi korporasııamen iskerlik seriktestik aıasynda The Wall Street Journal basylymynyń elektrondyq nusqasynyń sanaýly jyldyq jazylýyn taratý quqyǵyna da ıe boldy. «Bul bizdiń gazetimizdiń tarıhyndaǵy mańyzdy kezeń ǵana emes, ol barlyq qazaqstandyq iskerlik jýrnalıstıkadaǵy mańyzdy sáttiń biri. Biz dál The Wall Street Journal basylymymen shyǵarmashylyq tyǵyz baılanys ornatatynymyzdy maqtan tutamyz», – deıdi Alteco Partners JShS-niń bas dırektory Marat Qaıyrbekov.
«Kýrsıv» gazetiniń bas redaktory Dınara Shýmaevanyń sózinshe, eki jaqty baılanys gazettiń damýyna tyń serpin bermek. «Aldaǵy ýaqytta oqyrmandarymyzǵa amerıkandyq jáne álemdik ekonomıkanyń jańalyqtaryn naqty derek kózderinen bilýge múmkindik beretin joǵary dárejeli kontent usynatyn bolamyz» - deıdi ol.
Oqyrmandarǵa aqparat bere ketsek, The Wall Street Journal– jańalyqtardy, aqparatty, túsiniktemelerdi jáne saraptaýdy taratatyn ǵalamdyq jańalyq korporasııasy. Bedeldi korporasııa oqyrmandarǵa baspasóz basylymdaryn, ınternet saıttardy, mobıldi kontentti, áleýmettik jelilerdegi maqalalardy jáne túrli vıdeolardy usynady. Álemdik iskerlik pen qarjy jańalyqtarynyń bastaýysh derekkózi retindegi tájirıbesin eskere otyryp, basylym AQSh pen álemdegi jańalyqtarǵa qoljetkizýge múmkindik beredi. Sonymen qatar, The Wall Street Journal saıasatta bolatyn oqıǵalardy, óner, mádenıet, sport, densaýlyq jáne lifestyle jaıynda da jazady. Jýrnalıstıka salasynda úzdik jetistikteri úshin 37 Pýlıtser syılyǵynyń ıegeri atanǵan.
Arman OKTIаBR,
«Egemen Qazaqstan»
ALMATY