Qytaı tóraǵasy Sı Szınpın Qazaqstanǵa resmı saparmen kelýi múmkin. QHR-dyń Qazaqstan Respýblıkasyndaǵy tótenshe jáne ókiletti elshisi Chjan Sıao jýrnalısterge bergen suhbatynda aıtqan. Bul týraly Baq.kz tilshisi habarlady.
Elshi «Qytaı tóraǵasy Sı Szınpınniń Qazaqstanǵa resmı saparmen kelýi jáne QR Prezıdenti Nursultan Nazarbaevtyń Qytaıǵa barýy múmkin be» degen suraqqa jaýap berdi.
«Qazir bul suraqtar eki eldiń Syrtqy ister mınıstrlikteriniń kún tártibinde talqylanyp jatyr. Kelýi múmkin ekenin joqqa shyǵarmaımyn», - dedi dıplomat.
Elshiniń aıtýynsha, Astana men Beıjińde eki eldiń mádenı ortalyqtaryn ashý týraly usynys Qazaqstannyń Syrtqy ister mınıstrligine joldanǵan.
«Bıyl ekijaqty qarym-qatynastaǵy saıasatymyzdy osyǵan deıingi qalyptasqan dostyǵymyzdy nyǵaıtýǵa baǵyttaımyz. Bul – bizdiń kúndelikti jumysymyz. Búginde qaryshtap damyp kele jatqan ekonomıkalyq baılanysymyzdy, mádenı-gýmanıtarlyq salamyzdy ári qaraı jetildiremiz. Taǵy qazirgi maqsattarymnyń biri – Astanada qytaı mádenı ortalyǵyn jáne Pekınde qazaq mádenı ortalyǵyn ashý. Mádenı ortalyqty tezdetip ashý – men úshin kún tártibindegi ózekti máselelerdiń biri. Qazaqstannyń Syrtqy ister mınıstrligindegi áriptesterimizge usynysymyzdy jetkizdik. Qazir vedomstvo usynysty qarastyryp jatyr», - dedi Chjan Sıao.