Kókshetaý qalasynda Tileýles qajy atyndaǵy Quran jattaý ortalyǵy ashyldy. Oblysymyzda tuńǵysh ret ashylyp otyrǵan osyndaı ortalyqtyń lentasyn Qazaqstan musylmandar dinı basqarmasynyń Aqmola oblysyndaǵy ókili, Naýan haziret meshitiniń bas ımamy Qýanysh qajy Jumabaıuly men Kókshetaý qalasynyń qurmetti azamaty, eńbek ardageri Bolat Kóshimbaev qıdy.
Jańa ortalyqtyń basshysy Temirjan О́tejanulynyń aıtýynsha, qazirgi kúni munda 9 jas Quran-Kárimdi oqyp jatyr. Olardyń bári qalada kolledjderde oqıdy jáne sabaqtan bos ýaqyttarynda dinı bilim alady. Eki-úsh jylda bul jastar qasıetti kitapty túgel jattap, qarı atanbaq. Ortalyqta oqýshylardyń bilim alýy úshin qajetti jaǵdaılardyń bári jasalǵan. Jatatyn oryndary, tamaqtary tegin. Jastarǵa ustaz Baýyrjan Tólegenuly dáris berede. El arasynda kottedj qalashyǵy atanyp ketken shaǵyn aýdandaǵy eki qabatty sáýletti kottedjdi partııa ardageri, belgili qoǵam qaıratkeri, Kókshetaý qalasynyń qurmetti azamaty Bolat Ahmetjanuly meshitke syıǵa tartypty. Aqyldasa kele, ortalyq ataýyn Bolat aǵanyń dúnıeden ótken jary Tileýles qajy О́teýliqyzynyń esimimen ataýǵa sheshim qabyldanǵan. Ortalyqtyń ashylý saltanatynda Qýanysh qajy Jumabaıuly ǵımaratty jóndep, ishki árleý jumystaryn jasaýǵa qol ushyn bergen kásipkerlerge alǵysyn aıtyp, bıyl jazda syrtqy abattandyrý jumystary júrgiziletinin jáne birinshi qabattan dámhana ashylatynyn atap ótti. Jańa ortalyq aldaǵy ýaqytta Qurandy jatqa oqıtyn jas qarılardy daıyndaýǵa ıgi yqpalyn tıgizetin bolady.
Baıqal BAIÁDIL,
«Egemen Qazaqstan»
Kókshetaý qalasy.