Elimizde bala asyrap alý jónindegi ulttyq agenttik qurylady. Bul týraly «Analar úıi» qoǵamdyq qorynyń basshysy Aıdyn Rahymbaev habarlady.
«Jaqynda Memleket basshysy bala asyrap alý jónindegi ulttyq agenttik qurý týraly tapsyrmaǵa qol qoıdy. 2 jyl boıy osyǵan qol jetkize almaı kelgen bolatynbyz. Bul Memleket basshysynyń tapsyrmasynan keıin júzege asty» dedi Aıdyn Rahymbaev óziniń Facebook jelisindegi paraqshasynda.
Mesenat budan bylaı bala asyrap alý máselesi mınıstrlikter men ákimdikterden jańa agenttikke tapsyrylatynyn jetkizdi.
Sonymen qosa joba aıasynda 949 balaǵa jańa otbasy tabylǵanyn málimdedi. Onyń aıtýynsha, elimizde 122 mekeme, al jalpy 5337 jetim bar eken. «Alda kóp jumys kútip tur. Biraq bizge berilgen jańa dáreje bul isti biraz jeńildetpek. Eger bala asyrap alý prosesi jeńildese, elimizdegi balalar úıiniń de sany azaımaq» dedi kásipker.
«Árıne, memlekettik júıeni, sondaı-aq birqatar zańdy ózgertý kerek. Prezıdent qyrkúıek aıyna deıin ýaqyt berdi, eń bastysy, bıýrokrattar bul jumysty toqtatpaýy tıis. Biraq bul joly bizge kedergi keltiretin adamdardyń is-áreketin jarııa etetin bolamyz. Biz jaýapsyz adamdardyń kesirinen kem degende 2 jyldan astam ýaqytty bosqa joǵalttyq, al balalar «Balalar úıiniń» tutqyny bolyp otyr. Al ázirge biz asyrap alýǵa nıet bildirýshilerge kómektesýdi jalǵastyramyz! Búgingi kúni balalar úıinde negizinen 5 jastan asqan jáne aǵa-inileri bar balalar qalady. Bizdiń qor bala asyrap alýshylarǵa olardy irikteýge, qujattaryn rásimdeýge de kómektesedi!» delingen qoǵamdyq qor basshysynyń paraqshasynda.