Qurlyqtyq hokkeı lıgasynyń (QHL) kezekti týr oıynyn Astanada ótkizgen «Barys» Máskeýdiń «Spartagyn» úsh shaıba aıyrmashylyǵymen utyp jatyp, aqyrynda jeńisti ýysynan shyǵaryp aldy.
Bul bir keremet oıyn boldy. Básekeniń 29 sekýndynda QHL-dyń eń boıshań oıynshysy Vıktor Svedberg (boıy 204 santımetr) «Spartaktyń» qaqpasyn dál kózdep, jergilikti jankúıerlerdi bir jelpindirip tastasa, bas-aıaǵy jeti-segiz mınýt aralyǵynda astanalyqtar taǵy eki márte mergendik tanytty. Bul goldardyń avtorlary – Mett Frettın men Andre Petersson. Alaıda bul jaǵdaı qonaqtardyń saǵyn syndyra alǵan joq. Úziliske deıin olar eki shaıba soǵyp, esep aıyrmashylyǵyn qysqartty. Ekinshi taımda da shıelenisti tartys óz jalǵasyn tapty. Biraq bul joly basymdyq «Spartak» jaǵynda boldy. Qarsylastar komandasy soqqan úsh shaıbaǵa aıdyn ıeleri bir ǵana golmen jaýap qaıtardy. Úshinshi kezeńde qos komandanyń alma-kezek shabýyly esh nátıje bergen joq. Qorytyndy esep – 4:5.
Qazirgi kezde «Barys» turaqty birinshiliktiń jarys kestesinde 8 orynda keledi. Jerlesterimiz 48 kezdesý ótkizip, 67 upaıdy oljalaýda. Endi óziniń kelesi básekesin astanalyqtar óz aıdynynda ótkizedi. Búgin bizdiń jigitter Ýfanyń «Salavat Iýlaevyna» qarsy oınaıdy.
Daıyndaǵan Ǵalym SÚLEIMEN,
«Egemen Qazaqstan»