Memleket basshysy Nursultan Nazarbaev Zımbabve Respýblıkasynyń Prezıdenti Emmerson Mnangagvamen kezdesti.
Qazaqstanǵa resmı saparmen kelgen Zımbabve Respýblıkasynyń Prezıdenti Emmerson Mnangagvany saltanatty qarsy alý rásiminen keıin keńeıtilgen quramdaǵy kelissóz ótti.
Memleket basshysy eki el arasyndaǵy qarym-qatynastardy tereńdetýdiń mańyzdylyǵyn atap ótip, yqpaldastyqty odan ári damytýdyń negizgi baǵyttaryna arnaıy toqtaldy.
– Biz syrtqy saıasatymyzda, sonyń ishinde Afrıka baǵytynda keń aýqymdy saýda qarym-qatynastaryn damytýǵa jáne halyqaralyq bastamalardy ózara qoldaýǵa umtylatyn bolamyz, – dedi Qazaqstan Prezıdenti.
Zımbabve Respýblıkasynyń Prezıdenti Qazaqstanǵa resmı saparmen kelýge múmkindik týǵyzyp, Zımbabve delegasııasyna qonaqjaılyq kórsetkeni úshin Memleket basshysyna alǵys aıtty.
Kezdesý barysynda taraptar aýyl sharýashylyǵy men taý-ken ónerkásibi salalary boıynsha ekijaqty yntymaqtastyq ornatý, sondaı-aq Zımbabveniń kólik-logıstıka jelisin jańǵyrtý jáne qaıta óńdeý isinde birlesken jobalardy iske asyrý máselelerin talqylady.
Memleket basshysy Nursultan Nazarbaev Zımbabve Respýblıkasynyń Prezıdenti Emmerson Mnangagvanyń resmı saparynyń qorytyndysy boıynsha buqaralyq aqparat quraldary ókilderi úshin brıfıng ótkizdi.
Nursultan Nazarbaev BAQ ókilderi aldynda sóılegen sózinde bul sapardyń 1992 jyly Qazaqstan men Zımbabve arasynda dıplomatııalyq baılanystar ornatylǵannan beri alǵash ret júzege asyrylǵanyn atap ótti.
– Búgingi kezdesýdiń eki el arasyndaǵy, sondaı-aq Ortalyq Azııa men Ońtústik Afrıka óńirleriniń ózara qatynastaryn nyǵaıtý úderisindegi tarıhı mańyzy zor, – dedi Memleket basshysy.
Qazaqstan Prezıdenti ekijaqty kezdesý barysynda saıası dıalogty qoldaý jáne saýda yntymaqtastyǵyn keńeıtý jónindegi ýaǵdalastyqtarǵa qol jetkizilgenin aıtty.
– Jekelegen baǵyttar boıynsha ózara qarym-qatynas ornatýǵa múmkindikter mol. Bizdiń elderimiz arasynda keıbir uqsastyqtar bar. Zımbabve de Qazaqstan sııaqty paıdaly qazbalarǵa óte baı. Aýyl sharýashylyǵy salalarymyz da birdeı damýda. Qazaqstan taý-ken ónerkásibinde yntymaqtastyq ornatý jáne tájirıbe almasý, Zımbabvege aýyl sharýashylyǵy ónimderin jetkizý máselelerin qarastyrýǵa ázir, – dedi Nursultan Nazarbaev.
Memleket basshysy Zımbabve aýmaǵynda paıdaly qazbalar óndirý salasynda ózara yqpaldastyq ornatýdyń múmkindikterine toqtaldy.
Sondaı-aq Qazaqstan Prezıdenti Zımbabveniń kólik-logıstıka jelisin jańǵyrtý jáne qaıta óńdeý isinde birlesken jobalardy iske asyrý jónindegi yntymaqtastyqtyń áleýeti zor ekenin atap ótti.
– Jahandyq kún tártibindegi kóptegen basty másele boıynsha oı-pikirlerimiz sáıkes keledi. Biz Qazaqstannyń halyqaralyq bastamalaryna Harareniń qoldaý bildirgenin joǵary baǵalaımyz, – dedi Nursultan Nazarbaev.
Memleket basshysy kelissózder nátıjesinde taraptar Birikken Ulttar Uıymy aıasynda birlesken jumystar men ózara qoldaý jónindegi qalyptasqan tájirıbeni jalǵastyrýǵa baılanysty nıetterin maquldaǵanyn aıtty.
– Biz Qazaqstan baqylaýshy el bolyp sanalatyn Afrıka odaǵy aıasyndaǵy tyǵyz yntymaqtastyqty ilgeriletý jóninde ýaǵdalastyq. Jalpy, Emmerson Mnangagvanyń Astanaǵa alǵashqy resmı sapary eki memlekettiń túrli salalardaǵy tyǵyz qarym-qatynastardy odan ári damytýǵa múddeli ekenin kórsetip otyr, – dedi Qazaqstan Prezıdenti.
Nursultan Nazarbaev sapar barysynda qol jetkizilgen ýaǵdalastyqtar túrli baǵyttaǵy ózara yntymaqtastyqty damytýǵa oń serpin beretinine senim bildirdi.
Zımbabve Respýblıkasynyń Prezıdenti Qazaqstannyń ulttyq ekonomıkany damytý jáne jańǵyrtý jónindegi tájirıbesin qoldanýǵa múddeli ekenin atap ótti.
– Zımbabveniń qazirgi damýy Qazaqstannyń osydan 20 jyl burynǵy deńgeıine sáıkes keledi. Biz dostas eldiń 27 jyl boıy óz ekonomıkasyn qalaı órkendetkeni jóninde úırenýimiz kerek. Qazaqstannyń mundaı jetistikke jetkenine súısinemiz ári osyndaı damý jolymen júrýge umtylamyz, – dedi Emmerson Mnangagva.
Zımbabve Respýblıkasynyń Prezıdenti Qazaqstannyń Ulttyq ál-aýqat qoryn damytý jáne «Astana» halyqaralyq qarjy ortalyǵyn qurý jónindegi tájirıbesin atap ótti.
Sonymen qatar Emmerson Mnangagva Zımbabveni Qazaqstannyń úlgisimen Ońtústik Afrıkadaǵy kólik-logıstıkalyq hab retinde damytýdyń mańyzdylyǵyna toqtaldy.
Sońynda Zımbabve Prezıdenti qaýipsizdikti saqtaý jáne ıadrolyq qarýsyz álem qurý jónindegi Qazaqstannyń halyqaralyq bastamalaryn qoldaıtynyn aıtty.
Svetlana ǴALYMJANQYZY,
«Egemen Qazaqstan»