Pedagog bolǵandyqtan úzdiksiz izdenis, úzdiksiz sabylý, úzdiksiz jańashyldyq qajet. Ár sabaǵyna qajetti túrli-tústi kórnekilikterdiń ózine birshama qarjy kerek. Jumys pen úıdiń arasyna qatynaıtyn qoǵamdyq kóligi, tústigi jáne jeke otbasylyq shyǵyndary taǵy bar. Osyny esepteı kele, balasyna ne qalady degen oıǵa kelemiz. О́te ókinishti, sabylyp júrip halyqtyń balasymen birge óziniń de balasyn qatarynan qaldyrmaı ósiredi.
Pedagogterdiń ózi mektepke deıingi uıym, mektep, kolledj jáne joǵary oqý oryndarynyń mamandary bolyp bóline beredi. Al osy bir mektepke deıingi uıym tárbıeshisiniń jalaqysy bar-joǵy 28 myń teńge ekenin bireý bilse, bireý beıhabar. Bul qarjy qaǵaz shyǵarýǵa jetkiliksiz. Bastaýysh mekteptiń ustazy men arnaıy pánderdiń ustazynyń bir-birinen qandaı aıyrmashylyǵy nemese artyqshylyǵy bar degen suraq kókeıde turady. Al kolledj ben ýnıversıtettegi pedagogterdiń jaı-kúıin kim baqylap jatyr? Sonyń ishinde jeke bilim berý oryndarynyń jalaqy máselesi qalaı?
Mysaly, men kolledjde arnaıy pánder oqytýshysymyn. 22 635 teńge jalaqy alamyn desem, bireýge ertegi, bireýge jalǵan san retinde kóriner. Alaıda, bul – shyndyq. Aı boıy talaı stýdentke dáris oqımyz. 90 mınýt boıy jaǵymyz talyp, bilim nárin beremiz. Túsindirý kórnekilikterim, ǵylymı baıandamalarym, odan qalsa ǵylymı maqalalarym taǵy bar. Kýratorlyq qyzmetke eshqandaı qarajat qarastyrylmaǵan. Bul ne masqara deıtin shyǵarsyz? Degenmen, osylaısha toptaǵy stýdentterime ketetin shyǵyndarym bastan asady. Árqaısynyń jeke-jeke saýlyǵy men bilimine tikeleı jaýap beretin bolǵandyqtan, bul júktelgen mindetti op-ońaı laqtyra salǵym keledi. Alaıda, ár stýdenttiń jeke ózine tán bolmys-bitimderi bar. Árqaısy sińlimdeı kórinedi.
Álemdik deńgeıde shetelderdegi pedagogterdiń jalaqysyn zerttegen bolatynmyn. Mysaly, bir aılyq jalaqy Anglııa men Norvegııada – 1 500 000, Aýstralııada – 1 200 000, Japonııada 1 100 000, Kanadada 1 000 000, Koreıada 750 000 teńge kóleminde, al elimizde 21 000 teńgeden joǵary baǵany quraıdy. Ashy málimettiń ýdaı shyndyǵy osy. Qazaqstandyq pedagog shetelde 1 jyl jumys istep kelse, mıllıoner bolar edi. Bul ózgeniń qaltasyna úńilý emes, elimizdiń pedagogterine de laıyqty syı-qurmet jasalsa degen oı.
Aıda HASANOVA,
Oral gýmanıtarlyq kolledjiniń oqytýshysy, pedagogıka ǵylymdarynyń magıstri
Batys Qazaqstan oblysy