Aýyl jastary búginde burynǵydaı qıyndyqqa tózip otyra berýdiń jóni joq ekenin biledi. Aqkól aýyly Jankeldın aýdanynyń ortalyǵynan 130 shaqyrym jerde jatyr. Qostanaı men Ahmet Baıtursynovtyń kindik qany tamǵan osy óńirdiń arasy ushqan qustyń qanaty talatyndaı, 700 shaqyrym. Arqalyq qalasy da jaqyn emes. Al qaıda da bolsa búginde tehnıkasyz kún óte me?
Jurt minip júrgen jeńil kólikter aýylda da kóbeıip keledi. Tehnıka synbaı, tozbaı turmaıdy. Ondaıda aýyldastar sonaý alysqa at shaldyratyn nemese olardy dombaılap, «baltalap» ózderi jóndeıtin. Árıne, sapasyz jóndegen tehnıkanyń jaramdylyǵy da kópke barmaıdy da, ár úıdiń aldynda kólik qańtarylyp turýshy edi. Aqkól aýylyndaǵy Erbolat Dosov, Asylbek Qojamjarov jáne Beksultan Myrzahan degen úsh jigit shınomontaj sehyn ashqaly qatar jatqan Aqkól men Qarasý aýyldaryndaǵy tehnıka mingenderdiń kózi ashylyp qaldy.
–Aýylda otyzdyń syrtynda jeńil mashına, 30 traktor, birneshe júk kóligi bar. Sonymen qatar balyq aýlaýǵa kelgenderdiń kólikteri de dalanyń jolynda jıi syr beredi. Olar da osy shınomontaj sehyn izdep keledi. Jigitterdiń bastamasy aýyldyń naǵyz qajetine jarady, – deıdi Aqkól aýyldyq okrýginiń ákimi Balǵabaı Qalıev.
Jasy 26-27-ke endi kelgen úsh jigittiń arasyndaǵy Beksultan Myrzahan osy ıgi iske muryndyq bolǵan kórinedi. О́zi Qostanaı qalasyndaǵy Avtokólik kolledjin bitirgen, aýyldaǵy Jedel-járdem qyzmetiniń kóligin júrgizedi. Tehnıkadan habary jaman emes. Aýylda shınomontaj sehyn ashý úshin «Jas prodjekt» jobasyna qatysyp, ótken jyly 1 mıllıon teńge qarjy utyp alady. Oǵan jumysqa qajetti stanok, kompressor jáne taǵy basqa kerek-jaraqtaryn Qostanaı qalasynan satyp ákeledi. Beksultan óziniń dostary Erbolat pen Asylbekke qolynan kelgenin úıretedi. Qazir úsh jigittiń úsheýi de Arqalyq qalasyna baryp, 10 kúndik kýrsta oqyp jatyr. Tehnıka jóndeýdi, onyń ishinde dońǵalaq aýystyrý, jamaý sııaqty jóndeý jumystaryn barynsha úırenip qaıtatyn bolady.
– Erbolat pen Asylbek buryn kólden balyq aýlap, sony satyp, qarjy taýyp júretin. Myna «Shınomontajdy» ashqaly olar ózin tolyq jumyspen qamtamasyz etti, onyń syrtynda jigitter aýyldaǵy taǵy úsh jigitti jumysqa alatyn boldy, – deıdi aýyl ákimi Balǵabaı.
Aýyl ákiminiń aıtýynsha, «Jas prodjekt» jobasyna qatysqan aýyl jastary odan taǵy da qarjy alýǵa tıisti kórinedi. Demek, olardyń qolǵa alǵan jumysy qazirgiden de keńeıip, aıaǵynan turyp ketedi. О́ıtkeni tehnıka bar jerde onyń jóndeý jumystary da qosarlana júredi. Jastar osylaı óz isin ashamyn dese, jerdiń shalǵaılyǵy kedergi emes ekenin aqkóldik jigitterdiń qımyly kórsetkendeı.
Halyqaralyq Qaıta qurý jáne damý bankiniń jáne Bilim jáne ǵylym mınıstrliginiń jastar korpýsyn damytý jobasynyń sheńberinde ótken jyly Qostanaı oblysynda óz isine qarajat alý úshin 394 ótinish qabyldanǵan bolatyn. Úsh satyly irikteýden keıin 143 joba boıynsha 492 jas granttyq qarjyǵa ıe boldy. Olardyń búgingi jaǵdaıyna kelsek, 6 joba jabylyp qalǵan. Qalǵan 137 joba isin jalǵastyryp alyp ketken. Solardyń arasynda sonaý shalǵaıdaǵy úsh jigittiń «shınomontajy» da jumys istep tur. Onyń ashylýyna aýyldyń shalǵaılyǵy kedergi emes, qaıta sebep bolǵandaı. Shalǵaı aýylda kóliginiń dońǵalaǵyn aýystyrýǵa, jóndeýge suranys ylǵı da bar. «Alystan arbalaǵansha, jaqynnan dorbala» ustanymy Aqkól aýylynyń kúndelikti tirshilik kórinisine aınalǵan.
Názıra JÁRIMBET,
«Egemen Qazaqstan»
Qostanaı oblysy
Jankeldın aýdany
Aqkól aýyly