1-2 aqpan kúnderi Astanadaǵy ulttyq tennıs ortalyǵynda Devıs kýbogine irikteý aıasyndaǵy kezdesý ótedi. Qazaqstan qurama komandasyna bul joly portýgalııalyq tennısshiler qarsylas atanbaq dep jazady Olympic.kz.
Atalǵan match jeńimpazy Devıs kýboginiń fınaldyq kezeńine joldama alady. Aqtyq syn 18-24 qarasha aralyǵynda Madrıdte ótetinin eske salamyz.
Tennısshiler kezdesýi 1 aqpan kúni 14:00-de, 2 aqpan kúni 12:00-de bastalady.
Portýgalııa quramasy irikteý kezeńinde Ońtústik Afrıka Respýblıkasynan 4:0 esebimen jeńse, Qazaqstan tennısshileri Shveısarııadan 4:1 esebimen basym tústi.
Aıta ketelik, bizdiń komanda Devıs Kýboginiń ¼ fınalyna bes ret joldama alǵan bolatyn.
Devıs kýbogi – tennısten erler arasynda ótetin iri halyqaralyq komandalyq týrnır. 1900 jyldan beri uıymdastyrylatyn jarys 1979 jyldan bastap Halyqaralyq tennıs federasııasynyń qoldaýymen ótedi. Kýboktiń qazirgi ıegeri – Horvatııa quramasy.
Devıs kýboginiń fınaldyq kezeńinde 12 komanda baq synaıdy.