Túrkistan oblysy Polısııa departamentiniń Kóshi-qon basqarmasy qańtarda júrgizilgen «Mıgrant» jedel aldyn alý is-sharasyn qorytyndylady. Polıseıler 5 kún ishinde kóshi-qon zańnamasyn buzǵan 600-ge jýyq adamdy jaýapkershilikke tartty.
Oblys aýmaǵynda zańsyz kóshi-qondy anyqtaý, jolyn kesý, ýaqytsha jáne turaqty turatyn sheteldikterdi esepke alýdy maqsat etken «Mıgrant» is-sharasy barysynda 485 sheteldik pen 92 elimizdiń azamaty Qazaqstanǵa kelý, bolý jaıttary boıynsha jaýapkershilikke tartylǵan. Polısııa departamentiniń habarlaýynsha, quqyq buzýshylyqtardyń 321-i eskertilgen, 55-ne ákimshilik aıyppuldar salynyp, 164 sheteldik azamat ákimshilik qamaýǵa alynǵan. Sondaı-aq 28 sheteldik sot sheshimderimen el aýmaǵynan shyǵarylǵan. Jeke bastaryn anyqtaıtyn qujattary joq 24 adam Polısııa departamentiniń qabyldap-bólý mekemelerine ornalastyrylǵan. Al 180 shetel azamatynyń Qazaqstanda bolý merzimi qysqartyldy. Shetel azamattaryn zańsyz turǵyn úımen qamtamasyz etkeni úshin – 67, sheteldikterdiń jumys kúshin zańsyz paıdalanǵan – 25 el azamaty anyqtalyp, olardyń ákimshilik jaýapkershilikteri qaralǵan. Elden alastatý týraly sot sheshimin oryndamaýdyń 6 faktisi boıynsha qylmystyq ister qozǵalǵan.
Ǵalymjan ELShIBAI,
«Egemen Qazaqstan»
Túrkistan oblysy