Búgin Premer-Mınıstr Baqytjan Saǵyntaevtyń tóraǵalyǵymen ótken Úkimet otyrysynda Prezıdenttiń Bes áleýmettik bastamasyn iske asyrý barysy qaraldy.
«7–20–25» baǵdarlamasyn iske asyrý barysy týraly Ulttyq bank tóraǵasy Danııar Aqyshev baıandady. Onyń aıtýynsha, bul baǵdarlama qazaqstandyqtardyń turǵyn úı jaǵdaılaryn jaqsartýǵa baǵyttalǵan. Qatysý sharttary ótken jyldyń ortasynda bekitildi. Ipoteka naryǵyn damytý úshin zańnamalyq túzetýler engizildi. Baǵdarlama operatory bolyp «Baspana» uıymy quryldy. Baǵdarlama 2018 jylǵy shildede iske qosyldy. Baǵdarlamany iske asyrýǵa 8 bank qatysady.
Bıylǵy 17 qańtardaǵy jaǵdaı boıynsha «7–20–25» baǵdarlamasy aıasynda 52 mlrd teńgege 4350 ótinim maquldandy.
«Baǵdarlamany iske asyrý barysy buqaralyq aqparat quraldarynda, áleýmettik jelilerde júıeli túrde jarııalanady. Táýlik boıy koll-ortalyq jumys isteıdi. Ulttyq banktiń aýmaqtyq bólimsheleri men “Baspana” ıpotekalyq uıymy barlyq óńirlerdegi halyqpen jáne eńbek ujymdarymen kezdesý ótkizýde. Halyqpen belsendi túrde túsindirý jumysyn júrgizýge 6 mln-nan astam azamat qamtyldy», — dedi D. Aqyshev.
QR Ulttyq banki Baǵdarlamany jandandyrý úshin birqatar sharany usynady:
turǵyn úıge suranysty, demografııalyq ósimdi jáne halyq kóshi-qonyn eskere otyryp, turǵyn úı qurylysyn elimizdiń perspektıvalyq óńirlerinde qamtamasyz etý; JAO-ǵa «Baspana» IU qarajaty esebinen turǵyn úı salýǵa qarjy tartý quqyǵyn berý; «Nurly jer» baǵdarlamasy boıynsha salynǵan úılerdi Turǵyn úı qurylys jınaq banki arqyly salymshylar men kezekte turǵandarǵa jáne barlyq azamattarǵa «7-20-25» baǵdarlamasy boıynsha ıpotekalyq qaryzdar arqyly satý. Turǵyn úı sertıfıkattaryn berý naqty sıpatqa ıe bolýy kerek jáne baǵdarlamanyń basynda ǵana bolýy múmkin; Úkimettiń baǵdarlamaǵa menshik quqyǵynda baspanasy bar azamattarǵa qatysý quqyǵyn berý múmkindigin zerdeleýi;Bes áleýmettik bastamanyń ekinshi baǵytyn iske asyrý aıasynda jalaqysy tómen jumysshylardyń eńbekaqysyn kóbeıtý úshin olardyń salyq júktemesin azaıtý boıynsha atqarylyp jatqan jumystar týraly Ulttyq ekonomıka birinshi vıse-mınıstri Rýslan Dálenov baıandady.
«Barlyq daıyndyq jumystary júrgizildi jáne aıaqtaldy. Zańnamalyq ózgerister 2019 jyldyń 1 qańtarynan bastap kúshine endi, salyq tóleýshilerdiń arasynda túsindirý jumystary júrgizildi, jergilikti bıýdjetterdiń shyǵyndaryn óteý kózdelgen, normalar qoldanylýda», — dedi R. Dálenov.
Birinshi vıse-mınıstr zańnamalyq ózgeristerge qatysty, Salyq kodeksinde jalaqysy 63 125 teńgeden tómender úshin tártip ózgergenin aıtty. Olardyń salyq júktemesi 10 ese tómendetildi jáne 2 mln-ǵa jýyq jumysshy jylyna 15 myń teńgege deıin qosymsha kiris alady.
Jergilikti bıýdjetterdiń shyǵyndaryn óteý boıynsha aıtar bolsaq, ózgerister jergilikti bıýdjetterdiń shyǵyndaryna ákeledi. Osyǵan oraı, atalǵan shyǵyndar respýblıkalyq bıýdjet komıssııasynyń otyrysynda qaraldy jáne maquldandy. Respýblıkalyq bıýdjette transfertter kózdelgen. Osylaısha, jergilikti bıýdjetterdiń kiristeri jeńildikterdiń arqasynda azaımaıdy.
Buǵan qosa, R. Dálenov barlyq jumys berýshiler ózgeristermen tanysqanyn, halyq arasynda túsindirý jumystary júrgizilgenin atap ótti.
Sonymen qatar, ekinshi bastamada jeke tabys salyǵynyń progressıvti shkalasyn engizý múmkindigin zerdeleý tapsyrylǵan. Birinshi vıse-mınıstrdiń aıtýynsha, halyqaralyq tájirıbe zerdelendi jáne jaldamaly eńbekke aqy tóleýdegi aǵymdaǵy jaǵdaıǵa egjeı-tegjeıli taldaý júrgizildi.
Jalpy, UEM derekterine sáıkes, jalaqysy tómen jumysshylardyń salyq júktemesin azaıtý týraly tapsyrma oryndaldy.