Atyraýda О́zbekstannyń 26 azamaty arnaıy ruqsat qaǵazdaryn almastan jumys istep júrgenderi anyqtaldy. Olar densaýlyqqa zııan keletin aımaqta qubyr tazalaýmen aınalysqan. Sheteldik azamattar oblys aýmaǵynda bolý zańnamasyn da buzyp otyr.
Atyraý oblysy Polısııa departamentiniń baspasóz qyzmeti bergen málimetke súıensek, osy is boıynsha 38 ákimshilik hattama toltyrylypty. Al sheteldikterdi zańsyz jumysqa tartqan Atyraý qalasynyń turǵyny endi 140 AEK kóleminde aıyppul tóleıdi.
Jalpy munaıly óńirde sheteldik jumys kúshiniń aǵymy aıtarlyqtaı ósip otyr. Jaqynda ǵana Atyraý óńirlik kommýnıkasııalar qyzmetinde ótken brıfıngte oblystyq Polısııa departamentiniń kóshi-qon qyzmeti basqarmasynyń basshysy Bolat Dosqalıev ótken jyly óńirge 86 myńnan astam adam alys shetelderden jəne 77 myń adam TMD elderinen kelgenin aıtqan bolatyn.
Baqytgúl BABASh,
«Egemen Qazaqstan»
ATYRAÝ