«Jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerek. Kelesi jyldy «Jastar jyly» dep jarııalaýdy usynamyn», degen bolatyn Elbasy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda.
«Táýelsizdik urpaqtary» atty Jastar jylynyń ashylý saltanatynda sóılegen sózinde Memleket Basshysy jastarǵa qatysty ózekti máselelerdi tarata aıtyp, túrli salalar boıynsha qolǵa alynatyn bastamalarǵa qoldaý kórsetiletinin atap kórsetti.
Búginde qoǵamnyń damýy da, tehnologııanyń ósýi de óte shapshań, qarqyndy. Kóz ilespes jyldamdyqpen barlyq salalarda paıda bolyp, ornyqty. Aldymyzda Qazaqstandy aldyńǵy qatarly memleketterdiń sapyna qosý sekildi irgeli mindetter tur. Baǵdarymyz aıqyn. Osyǵan oraı bıyl da mańyzdy sheshimderdiń oryndalyp, qordalanǵan máselelerdiń túıini tarqatylaryna senimdimiz. Qarap otyrsaq, elimizde óskeleń urpaq úshin jasalyp jatqan qamqorlyqtar kóp. Oǵan biz naqty ispen jaýap berip, múmkindikterdi tıimdi paıdalanýǵa, bastamalardy qoldaýǵa jeke úlesimizdi qanshalyqty qosyp júrmiz degen saýal tóńireginde bir sát oılanǵan artyqtyq etpeıdi. О́ıtkeni, Prezıdentimiz atap ótkendeı jastar belsene aralasatyn sharýalar jetip artylady. Biz de birqatar ozyq jobalardy júzege asyrýdy oılastyryp otyrmyz. Máselen, osy jyly «Jas Otan» mobıldik qosymshasyn iske qospaq oıymyz bar. Sonymen qatar «CUBER arena» baǵdarlamasyna qatysýshylar quramyn jasaqtap, jastar arasynda kıbersporttyq oıyndar jelisin keńinen taratýǵa jedel kirisetin bolamyz.
Búgingi tańda «Jas Otan» jastar qanatyna on myńnan astam adam múshe. Oblys ortalyǵynda, barlyq aýdandarda, M.Qozybaev atyndaǵy SQMÝ men segiz kolledjde «Jas Otan» ortalyqtary jumys isteıdi. «Nur Otan» partııasynyń ústimizdegi jyly qolǵa alǵan «English for jastar» qanatqaqty jobasy boıynsha shetelden kelgen eriktilermen birge bizdiń jasotandyqtar alty aýdanda 500-den asa mektep oqýshysynyń aǵylshynsha sóıleý sheberlikterin jetildirdi. Aldaǵy ýaqytta jobany oqýshylardyń jazǵy demalysy kezinde úrdiske aınaldyramyz. Úzdik IT-jobalar men aqparattyq tehnologııalardy qoldaýǵa baǵyttalǵan «NURINTECH» jobasy da jastar úshin úlken múmkindikterge jol ashary anyq.
Qoldanystaǵy kitaphanalardy zamanaýı bilim taratý ortalyqtaryna aınaldyrý sharalaryn odan ári jandandyra túsemiz. Búginde oblysta osyndaı 14 ortalyq jumys isteıdi. Zamanaýı ortalyqtarda túrli taqyryptyq kezdesýler, pikirsaıystar men trenıngter uıymdastyrylyp, erekshe tolǵandyratyn ózekti de ótkir máseleler talqylanady.
Byltyr «Ardagerlerdi ardaqtaıyq» jobasy aıasynda ardagerlerge, tyl eńbekkerleri men jalǵyzilikti zeınetkerlerge júıeli qaıyrymdylyq sharalary kórsetilse, bıyl ár úıge jeke qamqorshylar bekitilip berildi. Jetim balalar úılerine de baryp, az qamtylǵan otbasylarǵa da kómek qolyn sozýdy nazardan tys qaldyrǵan emespiz. Sokolov, Polýdın balalar úılerine, Petropavl qalasyndaǵy otbasylyq úlgidegi balalar aýylyna jáne kámelettik jasqa tolmaǵandardy beıimdeý ortalyǵyna jıi baryp turamyz.
Adam eńbekqor bolyp, óz kásibin jaqsy meńgergende jáne laıyqty jalaqy alýǵa nemese jeke kásip ashyp, ony damytýǵa múmkindik bolǵan kezde tabystyń artary sózsiz. Jasyratyny joq, keı jastarymyz Úkimet tarapynan usynylatyn jeńildikti baǵdarlamalarǵa qatysýdyń jaı-japsaryn bile bermeıdi. Osy sebepti Elbasy «Shaǵyn nesıe berýdiń jáne oqytý isiniń oń tájirıbesinde barlyq óńirde jas kásipker baǵdarlamasyn ázirleýdi tapsyrdy. Bul joba sheńberinde jyl saıyn bilim alatyn jumyssyz jastar men ózin-ózi jumyspen qamtyǵandardyń sanyn 100 myńǵa deıin jetkizý mindeti qoıyldy. Biz osy baǵyt boıynsha «Bıznes-mentor» jobasyn júzege asyrýdy odan ári jalǵastyramyz. Onyń tıimdiligin tájirıbe aıqyn kórsetip otyr. Jastar dıalogtyq alańdarda óńirimizdegi tájirıbeli kásipkerlermen kezdesip, óz isterin ashý úshin aqyl-keńesterge júginedi. Baǵyt-baǵdarlar beriledi. Birneshe kezdesý uıymdastyrylyp, qatysýshylar qatarynda bıznestiń qyr-syryn meńgerip shyqqandary, jańa mamandyqqa ıkemdelgenderi , kásip ashqandary joq emes.
Prezıdent jastardyń jumyssyzdyq máselesine alańdaýshylyq bildirdi. Jastar saıasatyndaǵy negizgi máselelerdiń biri osy sanattaǵylardy turaqty jumyspen qamtý. Mektep bitirýshi túlekterdiń Reseıge, basqa elderge ketýiniń bir syry–jumyssyzdyq. Sondyqtan shekara asqan jastardy elge oraltýdyń, múmkindiginshe attestat alǵannan keıin elde qaldyrýdyń joldaryn utymdy júrgizbeı bolmaıdy. Qazir tehnıkalyq mamandyqtarǵa suranystyń artyp otyrǵanyn eskere otyryp, kóp profıldi kásip ıeleri bolýyna jan-jaqty jaǵdaı týdyrǵan lázim.
Jastar jylynda qolǵa alynatyn tıimdi jobalar men ıgi isterimiz jeterlik. Bizge úlken senim artylǵan eken, úmitti aqtaý–basty mindetimiz.
Abylaıhan QAIROLLAEV,
«Jas Otan» jastar qanaty oblystyq fılıalynyń tóraǵasy
Soltústik Qazaqstan oblysy