Semeıde Elbasy Nursultan Nazarbaevtyń halyqqa arnalaǵan «Qazaqstannyń Tórtinshi ónerkásiptik revolıýsııa jaǵdaıyndaǵy damýy» týraly Joldaýyna oraı «Nur Otan» partııasynyń fılıalynda barlyq salada eńbek etip júrgen hanymdar bas qosqan dóńgelek ústel bolyp ótti.
Dóńgelek ústeldi Shyǵys Qazaqstan oblystyq isker áıelder qaýymdastyǵynyń tóraıymy, depýtat Aınur Arǵynbekova uıymdastyrdy. Jıynǵa qaladaǵy kásipker áıelder, qoǵamdyq uıym ókilderi barlyǵy birlese qatysty. Qaladaǵy Dıagnostıkalyq ortalyqtyń dırektory, medısına salasynda eńbek etip júrgen depýtat Janat Moldaǵalıeva dóńgelek ústeldiń úılestirýshisi boldy.
- Men Elbasynyń «Bes áleýmettik bastamasyna» erekshe toqtalǵym keledi, - dedi «Nur Otan» partııasy Semeı qalalyq fılıaly tóraǵasynyń orynbasary Zýlfııa Jamaltdınova, - biz búginde osy baǵdarlama arqyly 7-20-25 jobasyn júzege asyrýdy qolǵa aldyq. Taǵy bir másele, áıelder arasynda bıznesti damytý. Sondaı-aq, stýdentterge arnalǵan grant jáne jataqhana máselesin de osyǵan qosyńyz. Stýdentter úshin jataqhana máselesi árqashan mańyzdy. Balalar qaıda turyp jatyr? Olar turatyn jaldamaly páterge ata-ana tóleı me, kim tóleıdi? Balalar kúni boıy oqýda, olar qaıdan tólesin? Árıne, osynyń barlyǵy kimdi alańdatady? Áıel adamdy. Mine, osy máselelerdiń barlyǵyn talqyǵa túsirsek jaqsy.
Dóńgelek ústel barysynda kóptegen problemalar qarastyryldy. Aımaqtyń memlekettik baǵdarlamalar aıasynda ekonomıkalyq damýy, osyǵan oraı qoǵamdy áıel adamdardyń alatyn róli qandaı degen suraqqa jaýap izdelindi.
Eń mańyzdy degen suraqtarǵa «Terra Vıta» JShS-iniń dırektory Nasıhat Isabaeva jaýap berdi. Onyń aıtýynsha, olar depýtat Aınur Arǵynbekovamen birge alys aýyldardy aralap, ol jaqtaǵy áıel adamdarmen sóılesken. Alys eldi-mekenderdegi de hanymdar bıznespen aınalysqysy keledi eken. Nasıhat Isabaevanyń aıtýynsha, bir áıel adam shashtaraz ashsam, onda tek saý adamdarǵa ǵana emes, tósek tartyp jatqan múgedek adamdarǵa da kómek jasap, shashyn, aıaq-qolynyń kútimin jasasam dep ótingen eken. Biraq, osyndaı áıel adamdar bıznesti qalaı ashý kerek, ol úshin kimnen kómek suraý kerek, qaı bankke barýǵa bolady, mine, osylardyń barlyǵynan beıhabar.
Jıynda Elbasy Joldaýy aıasynda «Pedagog statýsy» máselesi de talqylandy. Qazirde pedagog mamandyǵyn tek qana áıel adamdar meńgeretin boldy. Sondyqtan da er azamattardyń jastarymyzdyń bul salaǵa kelmeı jatqany ókinishti. Sondaı-aq, Semeıde qazaq, orys tilinde oqytatyn bastaýysh synyp muǵalimderi jetispeı jatyr. Semeı qalalyq bilim basqarmasy bastyǵynyń orynbasary Gúlnar Orazbekovanyń aıtýynsha, búginde «Pedagog statýsy» asa mańyzdy. Semeıde 4466 pedagog bar, onyń 4056-sy joǵary bilimdi, al 441-i orta arnaýly oqý ornyn bitirgen, ıaǵnı Muhtar Áýezov atyndaǵy pedagogıkalyq kolledjdiń túlekteri. Joǵary bilimdi ustazdardyń kóp bolýy bizdiń qalamyz úshin óte jaqsy.
- Eger bizdiń ustazdar matematıkalyq baǵyttaǵy pánder boıynsha aǵylshyn tilin úırený kýrsyn ótse, olardyń jalaqysy artady, - dedi Gúlnar Orazbekova, - qazir ustazdar biz sııaqty sheneýnikterden de artyq jalaqy alady. Olarǵa kategorııasy úshin jeke sol sııaqty V jáne V1 kategorııalary úshin taǵy da aqsha tólenedi. Jáne jańartylǵan bilim júıesin meńgergendikteri úshin taǵy da qosymsha aqy tólenedi.
Gúlnar Orazbekovanyń aıtýynsha, jańartylǵan bilim júıesine oraı kýrstyq oqýlardan ótip kelgenderge taǵy da ústemaqy qosylady. Elbasynyń Joldaýynan keıin «Pedagog statýsy» máselesi qozǵalyp, eńbegi sińgen ustazdarǵa 35 paıyz qosý da qolǵa alynypty. Synyp jetekshilerine dápter teksergeni úshin de jalaqysyna qosymsha aqy qosylmaq. Ustazdardyń júktemesi, máselen bir aptalyq júkteme 14 saǵattan 16 saǵatqa deıin azaıtylatyn bolǵan.
- Sebebi qazir jumys isteý qıyndap ketti, - dep túsindirdi Gúlnar Orazbekova, - jańartylǵan bilim júıesi muǵalimderden de, oqýshylardan da qajyr kúshti talap etedi. Bul «Kúndelik kz», «Bilimland» jáne taǵy basa baǵdarlamalar, kún saıyn ózgerip damý ústinde. Desek te bul bizdiń jańalyqqa jany qumar jastarymyz, jas muǵalimderimiz úshin taptyrmaıtyn baǵyt-baǵdar. Bizdiń jastar muǵalimdikti tańdaıdy dep úmittenemin. Bizde orys tildi bastaýysh synyp muǵalimderi, sol sııaqty balalar baqshasy men mektepke deıingi bilim berý ortalyqtarynda orys tilin oqytatyn muǵalimder men tárbıeshiler jetispeı jatyr. Bastaýysh synyp pen balabaqsha tárbıeshiligine keletin jastar bolsa biz qabyldaýǵa ázirmiz.
Raýshan QABJANQYZY,
«Egemen QAZAQSTAN»
Semeı