Venesýelada on myńdaǵan adam kóshege shyǵyp, Nıkolas Madýroǵa qarsylyqtaryn bildirip jatyr. Elde týyndaǵan narazylyq saldarynan bılik qyzmetinen ketti. Ulttyq assambleıanyń basshysy Hýan Gýaıdo ózin ýaqytsha úkimettiń basshysymyn dep málimdep úlgerdi.
Qańtardyń ortasynda Venesýelada prezıdenttik saılaý ótip, onda N.Madýro jeńiske jetken bolatyn. Alaıda turǵyndar daýys berýdiń ádiletsiz ótkenin alǵa tartyp, N.Madýronyń memleket tizginin ustaýyna qarsylyq tanytty.
Eki kúnge sozylǵan sherýde el astanasy Karakastyń turǵyndary «Biz kimbiz? Venesýela! Neni qalaımyz? Azattyq!» dep urandatyp, qala kóshelerin aralap shyqqan. The Guardian gazetiniń habarlaýynsha, narazylyq aksııasyn tarqatýǵa kelgen ulttyq gvardııanyń keıbir sarbazdary halyq jaǵyna ótip ketken eken.
Áıtse de, qalanyń kóp bóliginde kúshtik qurylymdar sherýshilerge sý shashyp, jınalǵandardy tarqatýǵa kúsh salyp jatyr. Oppozısııa ókilderiniń basshysy, ózin ýaqytsha úkimet basshysy dep málimdegen Hýan Gýaıdo kúshtik qurylymdardy Madýrony qoldaýdan bas tartýǵa shaqyrdy.
Karakasta jınalǵan sherýshiler aldynda sóılegen sózinde ol el basshysy mindetin ózine alyp, qazirgi bılikti qyzmetinen qýyp, ýaqytsha úkimet qurýǵa jáne ádil saılaý ótkizýge ýáde berdi.
AQSh prezıdenti Donald Tramp óz kezeginde H.Gýaıdony el basshysy dep sanaıtynyn málimdedi. «Venesýela halqy Madýroǵa jáne onyń rejımine qarsy batyl tura bilip, azattyq pen ádildikti talap etti» delingen Aq úı basshysynyń málimdemesinde.
D.Tramp óz sózinde N.Madýronyń el basqarýyn zańsyz dep sanaıtynyn jetkizip, Venesýela parlamenti ǵana halyqtyń daýysymen saılanǵanyn alǵa tartty.
«Amerıka memleketteriniń uıymy» da Hýan Gýaıdony el basshysy dep tanıtynyn málimdedi.
Buǵan deıin beımálim bolyp kelgen 35 jastaǵy H.Gýaıdo Venesýela parlamenti – Ulttyq assambleıany basqarǵaly beri Madýro ákimshiliginiń jemqorlyqqa batyp qalǵanyn jıi kóterip keldi.
Al parlament tóraǵasy atanǵan soń Madýronyń zańsyz saılanǵanyn alǵa tartyp, kelesi saılaýǵa deıin el tizginin qolǵa alýǵa konstıtýsııalyq quqyǵy bar ekenin málimdedi.