Taldyqorǵandaǵy I. Jansúgirov atyndaǵy Jetisý memlekettik ýnıversıtetiniń rektory Qýat Baımyrzaev oqý orynyndaǵy belsendi stýdenttermen kezdesý ótkizdi.
Kezdesýde stýdentterdiń bıylǵy Jastar jylynda uıymdastyratyn is-sharlary, maqsat-mindetteri, usynystary tyńdalyp, saralandy. Rektor barlyq bilimgerler úshin qýanyshty habar, oqý orny janynan Jastar ortalyǵy ashylǵanyn aıtty. Ýnıversıtettiń qurylymdyq bóliminiń biri bolatyn osy ortalyqqa 12 stýdent shtat boıynsha qyzmetke alynbaqshy. Olar bilim ordasyndaǵy túrli uıymdardyń jetekshisi retinde eńbek sińiretin bolady. Máselen, eriktiler tobyna, debat uıymdaryna, ár baǵyttaǵy klýbtarǵa jetekshilik etip, stýdenttik dekan qyzmetin de belsendi jastar atqarmaq.
Sonymen qatar ýnıversıtet ákimshiligi shyǵarmashylyq baǵytta izdenip júrgen stýdentterdiń halyqaralyq, respýblıkalyq deńgeıde ótkiziletin túrli baıqaýlarǵa qatysýyna eki ese qoldaý kórsetedi. Jıynda kásippen, ǵylymı zertteýlermen aınalysqysy kelgen stýdentter úshin erekshe jaǵdaı jasalatyndyǵy da aıtyldy. Stýdentterdiń shetelge shyǵý saparlary da nazardan tys qalmady. Mysalǵa, aldaǵy demalys kezinde Estonııa elimen tájirıbe almasý maqsatynda 10 kúndik jazǵy mektep uıymdastyrylatyn boldy.
Kezdesý sońynda I. Jansúgirov atyndaǵy Jetisý memlekettik ýnıversıtetiniń rektory Qýat Baımyrzaev belsendi stýdentterdi Elbasy artqan senim údesinen shyǵyp, Otanymyzdyń gúldenýine qyzmet etetin ult patrıoty bolýǵa shaqyrdy.
Qalmahanbet MUQAMETQALI,
«Egemen Qazaqstan»
Almaty oblysy