Elbasy Halyqaralyq saýda ortalyqtary qaýymdastyǵynyń basqarma múshesi (WTCA) Rolf Draakpen jáne «Nest Investments HOLDINGS» kompanııasynyń korporatıvtik ınvestısııalar jónindegi dırektory Mehran Efteharmen kezdesti. Bul týraly Aqordanyń baspasóz qyzmeti habarlady.
Jıynǵa Prezıdent Ákimshiliginiń basshysy Á.Isekeshev, Astana qalasynyń ákimi B.Sultanov jáne sáýletshi-dızaıner Kennet Brıýs Djeıms Anderson qatysty.
Kezdesý barysynda Memleket basshysyna elordada Dúnıejúzilik saýda ortalyǵynyń ǵımaratyn salý jónindegi joba usynyldy. Bul nysan tolyqtaı shetel ınvestısııasy esebinen boı kóteredi.
Nursultan Nazarbaev búgingi kezdesýdiń byltyr qazan aıynda Brıýsselde ótken Qazaqstan-Eýropa bıznes forýmy alańyndaǵy kelissózderdiń jalǵasy ekenin atap ótti.
– Biz Brıýsselde sizderdiń usynystaryńyzdy talqylap, taǵy da kezdesý ótkizý jóninde ýaǵdalasqan edik. Halyqaralyq saýda ortalyqtary qaýymdastyǵynyń mundaı jobalardy júzege asyrý isindegi mol tájirıbesin eskerip, bizdiń yntymaqtastyǵymyz eki tarapqa da jemisti bolady dep oılaımyn. Bul joba elordamyzdyń kelbeti men rýhyna saı kelip, onyń ajaryn asha túskenin qalar edim, – dedi Qazaqstan Prezıdenti.
Elbasy Astananyń boı kóterý úderisine erekshe toqtalyp, ondaǵy ár sáýlet nysanynyń tarıhy jóninde aıtty.
Nursultan Nazarbaev Astananyń búkil Eýrazııa qurlyǵynyń kindigi retinde batys pen shyǵys mádenıetteriniń sáýlet stılin jáne salt-dástúrin boıyna sińirgenin atap ótti.
Sonymen qatar, Qazaqstan Prezıdenti halyqaralyq «EKSPO-2017» mamandandyrylǵan kórmesiniń pavılondaryn salý barysy men nátıjeleri jóninde aıtty.
– Biz halyqaralyq «EKSPO-2017» kórmesin ótkizý quqyǵyna ıe bolǵanda baıqaý jarııalaǵan bolatynbyz. Dıametri 80 metrlik «Nur Álem» sferasy álemdegi biregeı nysan sanalady. Onyń qurylysyn ózim baqylap otyrdym. Búginde «EKSPO-2017» kórmesi ınfraqurylymynyń bazasynda «Astana» halyqaralyq qarjy ortalyǵyn, «Jasyl» tehnologııalardyń halyqaralyq ortalyǵyn, IT-startaptardyń halyqaralyq tehnoparkin ashtyq. Sondaı-aq, munda Halyqaralyq IT-ýnıversıtet qurylady. Barlyq jobalar sınergııasynyń mýltıplıkatıvtik turǵydan oń áseri bolady dep oılaımyn, – dedi Nursultan Nazarbaev.
Halyqaralyq saýda ortalyqtary qaýymdastyǵynyń basqarma múshesi Rolf Draak kezdesýge jáne elordada jańa nysan salý jónindegi jobany talqylaýǵa múmkindik bergeni úshin Memleket basshysyna alǵys bildirdi.
«Nest Investments HOLDINGS» kompanııasynyń korporatıvtik ınvestısııalar jónindegi dırektory Mehran Eftehar óz kompanııasy úshin saýda-ekonomıkalyq baılanystardy keńeıtý úderisinde Astananyń strategııalyq turǵydan mańyzdy ekenin aıtty.
– Bizdiń ınvestısııalyq tobymyzǵa qarasty iri 18 dúnıejúzilik saýda ortalyǵy bar. Mundaı nysandardy qalaı salyp, qalaı basqarýdy bilemiz. «Bir beldeý, bir jol» aýqymdy jobasyna qatysý jónindegi bizdiń strategııalyq baǵytymyzda Qazaqstan, sonyń ishinde Astana mańyzdy oryn alady, – dedi M.Eftehar.
Sońynda Memleket basshysy Dúnıejúzilik saýda ortalyǵynyń jańa ǵımaratynyń jobasyn maquldap, Astana qalasynyń ákimi B.Sultanovqa ony iske asyrý jónindegi birlesken jumystardy bastaýǵa tapsyrma berdi.