О́tken jyldyń qorytyndysy boıynsha, qala ekonomıkasynyń qurylymyndaǵy shaǵyn jáne orta bıznestiń úlesi 61%-dy qurap, 2017 jyldyń sáıkes kezeńimen salystyrǵanda 19,5%-ǵa artty dep habarlaıdy qala ákimdiginiń resmı saıty.
«Astana ekonomıka qurylymyndaǵy ShOB úlesi boıynsha óńirler arasynda kósh bastap tur. Elorda Memleket Basshysy qoıǵan mindetti merziminen buryn oryndady. Esińizde bolsa, 2050 jylǵa deıin jalpy óńirlik ónimdegi ShOB-tyń 50%-yn qamtamasyz etý tapsyrylǵan bolatyn. Bizde – 61%. Bul Astanada óz isin ashý úshin jaǵymdy klımat qurylǵanyn kórsetedi», – dedi Investısııalar jáne kásipkerlikti damytý basqarmasynyń basshysy Álisher Ábdiqadyrov.
Ákimdik óz tarapynan bıznesti engizý úshin barlyq prosedýralardy ońtaılandyrý boıynsha júıeli jumystardy júrgizýde. Mysal retinde, basqarma basshysy elordalyq «1000 oryn – kóshe saýdasy» baǵdarlamasyn atady. «О́tken jyly bizdiń basqarma Bitfury kompanııasymen birlesip, pılottyq joba jasaýǵa kelisti. «1000 oryn – kóshe saýdasy» qalalyq baǵdarlamasy aıasynda jer telimderin bólý aýksıondarynda tehnologııany engizý sheshildi. Eger buryn aýksıon kúni boıy ótip, kásipkerlerdiń ýaqytyn alsa, endi barlyǵy onlaın túrde ótetin bolady. Tirkeý, kepildik jarnany tóleý jáne saýda-sattyqqa qatysý endi telefon arqyly da qoljetimdi.
Al saýda-sattyqty naqty ýaqyt rejıminde kez kelgen adam qaraı alady. Bloktardy engizý prosesti tolyqtaı ashyq jáne transparentti etýge múmkindik berdi. Aýksıondardyń barlyq stavkalary men nátıjeleri endi Bas prokýratýranyń Quqyqtyq statıstıka jáne arnaıy esepke alý komıtetimen júrgiziledi», – dep túsindirdi ol.
A.Ábdiqadyrovtyń aqparaty boıynsha, 2019 jyldyń 1 qańtaryndaǵy jaǵdaıǵa sáıkes, Astanada kásipkerlik sýbektileriniń sany 125 myńdy qurap, ótken jylmen salystyrǵanda 30%-ǵa artty. 2018 jyldyń qorytyndysy boıynsha elordada 13 myńnan astam ShOB sýbektisi tirkelgen. Olardyń jumysy ónim shyǵarýdy 21,9%-ǵa ulǵaıtty.