Bul týraly búgin Ortalyq kommýnıkasııalar qyzmetinde ótken brıfıngte Densaýlyq saqtaý vıse-mınıstri Oljas Ábishev aıtty.
«О́tken jyly 12 aıdyń ishinde jergilikti atqarýshy organdarmen medısınalyq mekemelerdi kompıýtermen jabdyqtaý, ınternet jelisin jetkizý jáne arnaıy medısınalyq aqparattyq júıelerdi ornatý sııaqty úsh baǵyt boıynsha jumys atqardyq. 2019 jyldyń qańtaryndaǵy kórsetkishke súıense, osy úsh baǵyt boıynsha ortalyq aýdandarǵa deıingi 99,8 paıyz medısınalyq mekeme qamtylǵan. Osylaısha, medısına salasyndaǵy esep berýdiń 121 túri onlaın júıege tolyqtaı kóshti. Sonyń nátıjesinde biz 250 mıllıon teńgeni únemdep otyrmyz. Buryn ol aqshaǵa qaǵaz, flıýroplenka jáne taǵy basqa zattar satyp alynatyn», dedi Oljas Ábishev.
Vıse-mınıstr aýyl emhanalarynyń tolyǵymen elektrondy formatqa aýysýy 2021 jyly aıaqtalatynyn aıtty.
«Bıyl biz osy saladaǵy jumysty jalǵastyratyn bolamyz. Sebebi aýdan deńgeıinen tómen medısınalyq mekemelerde ınternet áli joq. Aqparat jáne kommýnıkasııalar mınıstrligimen birlese otyryp, 2021 jylǵa deıin aýyl emhanalaryn da tolyǵymen elektrondy formatqa aýystyrýdy josparlap otyrmyz», dedi ol.
Maıgúl SULTAN,
«Egemen Qazaqstan»