Búgingi tańda Jambyl oblysynda týrızm salasyn damytý boıynsha kóptegen jumystar atqarylýda. Qazirgi kezde kelýshilerdi Áýlıeata óńiriniń baı tarıhymen tanystyrý basty maqsat bolyp otyr. О́ńirde búginde týrızm salasy qalaı damýda, mejelengen mindetter tolyq oryndalǵan ba degen másele tóńireginde Jambyl oblystyq týrızm basqarmasynyń basshysy Qarlyǵash Aralbekova aıtyp berdi.
«Jambyl oblysynyń týrızmi – óńiraralyq jeke shekara yntymaqtastyǵy salasynda úlken áleýetke ıe. Sondyqtan da bul salany damytýda bar múmkindikter qarastyrylýda. Atalǵan basqarmada ótken jyly óńirlerdi damytý baǵdarlamasy aıasynda jeti nysanaly ındıkator bekitilgen. Mejelengen mindetterdiń qatarynda ishki týrızm boıynsha qyzmet kórsetiletin kelýshiler sanyn arttyrý. Ekinshi, týrızmdi damytý baǵytynda syrttan keletin týrıster sanyn kóbeıtý jáne týrısterge usynylǵan qonaq úıler men servıstik qyzmet sapasyn arttyrý», deıdi basqarma basshysy.
Sonymen qatar, Qarlyǵash Aralbekova óz sózinde týrızm salasynda ótken jyldyń toǵyz aıynyń kórsetkishi boıynsha atalǵan ındıkatorlar Taraz qalasy, T.Rysqulov jáne Merki aýdandarynda tolyq oryndalmaǵanyn jetkizdi. Naqty aıtqanda, atalǵan aımaqtarda qonaq úılerdiń joqtyǵy men kelýshilerge durys qyzmet kórsetilmeýi de aıtyldy. Bul rette jaýapty mamandar ketken kemshilikterdi qolǵa alyp, jumys jasaımyz dep sendirdi.
Basqarma basshysynyń aıtýynsha, týrızm salasyna qatysty ózekti máseleniń taǵy biri aımaqta tarıhı-mádenı oryndardyń deni Respýblıkalyq deńgeıdegi nysandar qataryna engizilgen. Búgingi tańda óńirdegi «Aısha bıbi», «Qarahan» kesenesi, «Aqyrtas» kesheni kelýshilerge aqyly túrde qyzmet kórsetkenimen de, ondaǵy servıstik qyzmet sapasy kópshilik kóńilinen shyǵa bermeıdi. Al, bul qasıetti oryndar Respýblıka bıýdjetine qaraǵandyqtan, olarǵa jergilikti bıýdjetten qarjy bólinbeıdi. Al, Jambyl oblysynyń ákimi Asqar Myrzahmetov bul máseleni sheshý kerek ekenin aıtqan bolatyn.
Sonymen qatar, aǵymdaǵy jyly týrızm salasyn keshendi damytý baǵdarlamasy aıasynda quny 7,401 mıllıard teńge bolatyn 30 joba qolǵa alynbaq. Onyń búginde jeteýi daıyn eken. «Batys Eýropa – Batys Qytaı» avtojoly boıynda týrısterge arnalǵan jol boıyndaǵy servıstik keshenderdiń ulttyq standarttarǵa sáıkestendirý boıynsha da jumystar qolǵa alynatyn bolady.
Hamıt ESAMAN,
«Egemen Qazagstan»
Jambyl oblysy