Qyzylordalyq polıseıler A-17 tas jolynda boranda qalyp qoıǵan 30-dan astam avtokóliktiń júrgizýshileri men jolaýshylaryn qar qursaýynan qutqardy.
28 qańtarda «Qyzylorda-Pavlodar-Ýspenko» respýblıkalyq mańyzy bar tas jolynyń 12 shaqyrymynda Oblystyq Polısııa departamenti JPQB patrýldik-polısııa rotasynyń qyzmetkerleri polısııa aǵa leıtenanty Qaırat Ahmetov, polısııa leıtenanty Nurbek Altybaev jáne vzvod komandıri polısııa kapıtany Maqsat Narmanov qyzmet ótkerý barysynda saǵat 20-40 shamasynda Qyzylorda qalasynan kele jatqan «Toıota-Kamrı» avtokóligi toqtap, júrgizýshisi «Astana-Qyzylorda» baǵytyndaǵy reıstik avtobýs keshigip jatqandyǵyn atap kórsetken.
Polısııa qyzmetkerleri dereý surastyrý jumystaryn júrgizip respýblıkalyq tas jolynda 25 shaqyrymynan bastap uıaly telefon baılanysy joqtyǵyn eskerip, kezekshi bólimine habarlasyp jolǵa shyqqan.
Aralaý barysynda, atalǵan tas joldyń 198 shaqyrymynda jolda boran bolyp, joldyń qar qursaýymen jabylǵanyn baıqaǵan soń, sol jerde Tótenshe jaǵdaılar departamentiniń «Kamaz» avtokóligimen birlesken túrde tas joldy aralaý jumystaryn júrgizgen.
Nátıjesinde, tas joldyń 205 shaqyrymynan bastap, Qaraǵandy oblysynyń aýmaǵyndaǵy 225 shaqyrymy aralyǵynda turyp qalǵan «Astana-Qyzylorda» baǵytyndaǵy reıstik avtobýsy 18 jolaýshysymen, odan bólek 5 kishi syıymdylyqty avtobýstar, 11 júk avtokólikteri, 15 jeńil avtokólikteriniń jolaýshylary men júrgizýshilerine kómek kórsetilip, «KazAvtoJol», Tótenshe jaǵdaılar departamenti qyzmetkerlerimen birlesip Qyzylorda qalasyna jetkizildi.