2026 jyldyń jazǵy maýsymynda Qazaqstan temir joly shamamen 4,2 mıllıon jolaýshyny tasymaldaýdy josparlap otyr. Onyń ishinde 230 myńǵa jýyq adam Alakólge poıyzben qatynaıdy dep kútiledi, dep habarlaıdy Egemen.kz.
Jaz mezgilinde suranystyń kúrt artýyna baılanysty ulttyq tasymaldaýshy 15 qosymsha temirjol baǵytyn iske qospaq. Alakólge qatynaıtyn poıyzdar Astana, Almaty, Semeı, О́skemen, Qyzylorda jáne Pavlodar qalalarynan júredi.
Qosymsha reıster qatarynda «Nurly jol – Dostyq», «Almaty – Dostyq», «Semeı – Dostyq», «О́skemen – Dostyq» baǵyttary men birqatar tirkeme vagondar bar. Sonymen qatar jazǵy maýsymda «Aqtóbe – Nurly jol», «Qaraǵandy – Balqash», «Almaty-2 – Semeı» baǵyttary boıynsha da qosymsha poıyzdar qatynaıdy.
«Jolaýshylar tasymaly» AQ basqarma tóraǵasy Dııar Núsipqojanov jazǵy kezeńde kýrorttyq aımaqtar men iri qalalarǵa suranys jyl saıyn ósip kele jatqanyn aıtty. Onyń sózinshe, jolaýshylarǵa qyzmet kórsetý úshin 2 myńnan astam vagon paıdalanylady. Olardyń qatarynda standartty vagondar, «Talgo» quramdary jáne elektr poıyzdary bar.
Sondaı-aq vagondardyń 86 paıyzy kondısıoner júıesimen jabdyqtalǵan. Barlyq jyljymaly quram maýsym aldynda tehnıkalyq tekseristen ótip, sanıtarlyq óńdeýden ótkizilgen.
Poıyzdarda jolaýshylar úshin mýltımedııalyq oıyn-saýyq portaly jumys isteıdi. Jolaýshylar fılm kórip, mýzyka tyńdaı alady. Erekshe qajettiligi bar azamattarǵa arnaıy beıimdelgen vagondar qarastyrylǵan. Sonymen birge bılet rásimdeý men vokzaldaǵy kómek qyzmetterine onlaın ótinim berý múmkindigi de bar.
О́zbekstanda eki qabatty poıyzdar qatynaıdy
Jazǵy maýsymǵa daıyndyq barysynda Qazaqstan temir joly, «Jolaýshylar tasymaly» AQ, týrıstik operatorlar men «Atameken» ulttyq kásipkerler palatasy birlesken jumys keńesterin ótkizip jatyr. Onda jolaýshylar aǵynyn tıimdi uıymdastyrý jáne suranysy joǵary baǵyttarǵa qosymsha reıster ashý máseleleri talqylanýda.
Bıletter temirjol kassalarynda, bilet.railways.kz saıtynda jáne túrli sıfrlyq servıster arqyly satylyp jatyr.
Eske salaıyq, Abaı oblysyna jumys sapary barysynda Oljas Bektenovke Alakóldi damytýdyń keshendi jospary tanystyryldy.