Batys Qazaqstan oblysynyń Bórli aýdanynda 2018 jyldyń aqpan aıynda «GOLD» volonterlik korpýsy qurylǵan edi. Alǵashynda Aqsaı qalasyndaǵy mektep pen kolledj oqýshylarynan qurylǵan toptyń bastamasy keıin búkil aýdanǵa tarap ketti.
Bastamanyń basynda Aqsaı qalasynyń №1, 2, 4, 6, 7 mektepteriniń oqýshylary jáne Aqsaı tehnıkalyq kolledjiniń stýdentteri turǵan eken. Uıymnyń ataýyn «GOLD» dep qoıǵan da solar. Volonterlik korpýs óz ishinen 4 bólimge bólingen. Jalǵyzilikti qarttarǵa kómektesý – jastar josparlaǵan jumystardyń bir baǵyty ǵana.
– Jyl boıy bizdiń volonterler ár túrli baǵyttaǵy sharalarǵa belsene qatysty, – deıdi Bórli aýdandyq jastar resýrstyq ortalyǵy Aqparattyq-taldaý bóliminiń qyzmetkeri Aıkórkem Qýatova.
Jalǵyzbasty qart adamdarǵa kómek, ásirese, qys kezinde kerek. «GOLD» volonterlik korpýsy quryla salysymen iske kirisip ketti. Onyń ústine dál osy kezderi Qazaqstan boıynsha «100 naqty kómek», oblysta «Járdem» aksııasy ótti. Bórliniń «altyn» balalary 2018 jyldyń aqpan, naýryz aılarynda osy aksııalar aıasynda 16 márte shara uıymdasyp, úlkenderdiń alǵysyn aldy. О́z bastamalarymen qazan men qarasha aılarynda «Úlkenge qurmet» aksııasyn ótkizip, taǵy 7 otbasyna kómek kórsetti.
«Bizdiń jastar resýrstyq ortalyǵynyń ádiskerleri ár aýylda bar», deıdi Aıkórkem. Osy ádiskerlerdiń uıymdastyrýymen shaǵyn aýyl jastary da saýapty iske jumyla ketken. Sóıtip, Bórli aýdanyna qarasty Aqsý, О́spen, Qaraqudyq, Býmakól aýyldarynda da qamkóńil jandardy qýantqan qamqorlyq aksııasy ótti. Al qazir aýdandaǵy barlyq 13 aýyldyq okrýgte jelilik jospar qurylyp, qarttarǵa kómektesý aýyl belsendileriniń ádettegi sharýasyna aınaldy.
Aıkórkemniń qoıyn dápterinde Aqsaı qalasy boıynsha jeke úıde turatyn múgedek jáne jalǵyzbasty 20 adamnyń tizimi jazýly tur. Aýdan boıynsha 12 soǵys ardageri de erekshe nazarǵa alynǵan. Kimge qandaı kómek kerek, kimniń qandaı muqtajy bar – jastar jiti qadaǵalap otyrady.
– Elbasynyń Jastar jylynyń saltanatty ashylýynda sóılegen sózin bárimiz tyńdadyq. Sonyń ishinde volonterlik qozǵalys týraly aıtqanda, erekshe sezimde boldym. «Stýdentter qaýymy – eriktilik pen qaıyrymdylyqtyń qýatty resýrsy. Bul jas adamdardyń eńbek naryǵyna jedel beıimdelýine jáne olardyń ári qaraı óz jolyn tabýyna septigin tıgizedi. Mysaly, halyqaralyq baǵalaý boıynsha álemniń eń iri 300 kompanııasy qyzmetkerleriniń úshten biri apta saıyn jumys ýaqytynyń 1 saǵatyna jýyǵyn volonterlik qyzmetke jumsaıdy. Úkimetke volonterlik qyzmetpen belsendi aınalysatyn JOO stýdentteriniń stıpendııasyn 30%-ke deıin kóterýdi tapsyramyn» degende, bizdiń byltyrdan beri aınalysyp júrgen jumysymyzdyń elengenine, memlekettik dárejede qoldaý tapqanyna erekshe qýandyq, − deıdi Aıkórkem.
Árıne, bórlilik erikti jastardy aýdan ákimdigi de barynsha qoldap keledi. 2018 jyldy qortyndylaǵan «Jomart júrek» baıqaýynda «GOLD» volonterlik korpýsynyń eriktisi Aınella Armanova «Úzdik volonter» atansa, osy toptyń taǵy bir múshesi Aqnur Qalıla «Jyl úzdigi-2018» jastar syılyǵyna ıe boldy.
Qazirgi tańda Aqsaı qalasynda 32 volonter Jastar resýrstyq ortalyǵynyń jas mamandarymen birlese túrli sharany uıymdastyryp júr.
Bıyl Batys Qazaqstanda qar qalyń, boran kóp. Jaqynda ǵana aqsaılyq eriktiler kúrek-quraldaryn alyp, Sovet kóshesindegi №36 jáne №118 úılerdiń aýlasyn qardan tazartyp berdi.
Qazbek QUTTYMURATULY,
«Egemen Qazaqstan»
Batys Qazaqstan oblysy