Nurlan Nyǵmatýlınniń tóraǵalyǵymen ótken palatanyń jalpy otyrysynda depýtat Sapar Ahmetov avtokólikterdi mindetti tehnıkalyq baıqaýdan ótkizýdiń «nemquraıly jáne formaldy ótkiziletini bárimizge málim» deı kele Indýstrııa jáne ınfraqurylymdyq damý mınıstrine bul salada jemqorlyq jaǵdaılarynyń oryn alyp otyrǵandyǵyn da aıtty. Sondyqtan da atalǵan zań jobasynyń osy keleńsiz jaǵdaılardy túbegeıli joıýǵa áserin jáne biryńǵaı aqparattyq júıeniń ıntegrasııasy týraly surady.
Mınıstr osy oraıda Ishki ister, Aýyl sharýashylyǵy, Qorǵanys, sondaı-aq Indýstrııa jáne ınfraqurylymdyq damý mınıstrlikteriniń aqparattyq júıesi biriktiriletindigin jáne qujattardyń sıfrlyq úlgige kóshetindigin jetkizdi.
– Búgingi kúni tehnıkalyq baıqaý qujattaryna júrgizýshiler qolmen zańsyz ózgeris engizip jatyr. Buǵan endi jol berilmeıdi, – dedi J.Qasymbek.
Depýtattar kótergen taǵy bir másele kóliktik baqylaý organdarynyń sheteldik kólikterdi jappaı toqtatýǵa múmkindik beretin zańdy negizderge qatysty boldy. Máselen, zań jobasynda kóliktiń shetelde tirkelgendigi ony laýazymdy tulǵanyń toqtatýyna negiz bola alady degen talap bar bop shyqty. Bul talapqa depýtat Amanjan Jamalov túsinbestik tanytyp, bundaı negizdiń qısynsyz ekendigin jáne týrıstik salanyń damýyna tusaý bolmaı ma degen usynysyn jetkizdi.
Oǵan Indýstrııa jáne ınfraqurylymdyq damý mınıstri jańa talaptyń tek kommersııalyq tehnıkaǵa, ıaǵnı jolaýshylar men júk tasymaldaýshy sheteldikterge qatysty ekendigin atap ótti. Máselen, mınıstrlik osy talap arqyly Qazaqstan arqyly ótetin sheteldik kólikterdiń bizdiń elimizde jolaýshylar jáne júk tasymalyna tosqaýyl qoımaq. Dálirek aıtqanda, «jolshybaı ala ketý» degen paıdanyń kózine tyıym salynady.
N.Nyǵmatýlın osy oraıda, kún saıyn elimizdiń shekarasynan sheteldik 6 myń kólik ótetindigin, onyń 4 myńy – jeńil avtokólik, 100 qaraly avtobýs ekendigin aıtty. Al olardy tek sheteldik bolǵandyǵy úshin ǵana toqtatý jemqorlyqqa jol ashyp, syrttan keletin týrısterdi shoshytýy múmkin ekendigin jetkizdi.
Máseleniń týrıstik salaǵa qatysty tusyna jaýap bergen Mádenıet jáne sport mınıstriniń orynbasary Erlan Qojaǵapanov el shekarasynan týrıstik avtobýstardy kedergisiz ótkizýge Ulttyq qaýipsizdik komıteti kelisim bergendigin, jyl saıyn elimizge keletin týrıster sany artqandyǵyn aıta bastap edi, Májilis Tóraǵasy onyń sózin kilt úzdi.
– Sizder týrıster mingen kólikterdi negizsiz toqtaýǵa jol beretin talaptarǵa nelikten kelistińizder? Zań talaptary bir birine qaıshy kelmeýi tıis. Atalǵan máseleni zań jobasynyń ekinshi oqylymyna deıin tártipke keltirińizder, – dep Májilis Tóraǵasy kesimdi sózin aıtty.
Jalpy otyrysta depýtattar zań jobasymen qamtylǵan onlaın taksı qyzmetin tártipke keltirý, arzan áýe tasymalyn uıymdastyrý jáne basqa da ózekti máselelerdi kóterdi.
Saıyp kelgende, kún tártibine shyǵarylǵan zań jobalarynyń barlyǵy maquldanyp, depýtattar ortalyq memlekettik organdardyń basshylaryna dástúrli saýaldaryn joldady.
Taǵy bir aıta keterligi, depýtattar búginnen bastap aımaqtarǵa shyǵyp, saılaýshylarymen kezdesýlerin bastaıdy.
Serik ÁBDIBEK,
«Egemen Qazagstan»