Búgin, 4 aqpanda aımaq basshysy Nurlan Noǵaev oblys aktıvine jańa orynbasary Aıbek Krambaevty tanystyrdy.
Aıbek Krambaev Atyraý oblystyq ákimdiginde kásipkerlik, ınvestısııa tartý, munaı-gaz sektory, sonyń ishinde qazaqstandyq mazmun jáne sıfrlandyrý máselelerine jetekshilik etetin bolady. Jańa orynbasardyń kandıdatýrasy Qazaqstan Respýblıkasy Prezıdent Ákimshiligimen kelisilgen.
Buryn osy salaǵa jaýapty bolǵan Atyraý oblysy ákiminiń birinshi orynbasary Serik Shapkenov endi aımaqtyń áleýmettik máselelerine – densaýlyq saqtaý, bilim berý, jumyspen qamtý jáne áleýmettik qorǵaý, t.b. jetekshilik jasaıdy.
Aıbek Krambaevtyń menedjment jáne marketıng salalarynda bakalavr, magıstrant dárejeleri bar. Ár jyldary Q.Jubanov atyndaǵy Aqtóbe memlekettik ýnıversıtetin, QR Prezıdenti janyndaǵy menedjment, ekonomıka jáne boljamdaý ınstıtýtyn, I.Gýbkın atyndaǵy Reseı memlekettik munaı-gaz ınstıtýtyn bitirgen.
Eńbek jolyn 1999 jyly munaı kompanııasynda operator qyzmetinen bastaǵan, 2001-2005 jyldary jeke kompanııalarda marketıng jáne tarıf saıasaty bóliminiń basshysy, ishki gaz tasymaldaý bóliminiń basshysy, marketıng menedjeri laýazymdarynda jumys istedi. 2005 – 2007 jyldary – «QazMunaıGaz UK» AQ kelisim-shart jónindegi menedjer, tehnıkalyq top basshysy boldy.
2007 – 2010 jyldary Ulybrıtanııa, London qalasynda Qarashyǵanaq Petrolıým Development Lımıted ýákiletti organy tehnıkalyq toptyń jetekshi ókili qyzmetin atqarǵan.
2010 – 2012 jyldary «Samuryq Qazyna» ulttyq ál-aýqat qory» AQ Qarashyǵanaq jobasy boıynsha ýákiletti organynda tehnıkalyq topty basqardy.
2012 jyldyń tamyz- jeltoqsan aılarynda «PSA» JShS Qarashyǵanaq jobasy boıynsha bas menedjer qyzmetin atqardy.
2012 jyldyń jeltoqsany men 2015 jyldyń qarasha aıy arasynda «PSA» JShS kelisim-shart monıtorıngi jáne marketıngi departamentiniń dırektory boldy.
2015 jyldan búginge deıin «PSA» JShS basqarma múshesi, bıznesti jáne jergilikti qamtýdy damytý boıynsha basqarýshy dırektor laýazymyn atqardy.
Nurlan Noǵaev Aıbek Krambaevtyń Qazaqstan Respýblıkasynyń múddesin iri munaı-gaz jobalarynda qorǵaǵan, jergilikti qamtýdy damytý baǵdarlamasyn júzege asyrýǵa, sheteldik kompanııalarda kadrlardy ulttandyrýǵa baqylaý jasaǵan tájirıbeli maman ekenin atap ótti. Shetelde jumys istegen, 4 til, sonyń ishinde aǵylshyn, túrik tilderin meńgergen.
- Jańa orynbasardyń tájirıbesi júktelgen mindetterdi atqarýǵa septigin tıgizedi degen senimdemin, - dedi Atyraý oblysynyń ákimi.
Baqytgúl BABASh,
«Egemen Qazaqstan»
Atyraý