Memlekettik qyzmet isteri jáne sybaılas jemqorlyqqa qarsy kúres agenttigi men Astana qalasy ákimdigi birlese qolǵa alǵan «Astana – adaldyq alańy» jobasynyń maqsaty – halyqqa qyzmet kórsetýdiń sapasyn arttyrý, jemqorlyqqa jol bermeý, bıznes úshin ákimshilik kedergilerdi joıý, qoǵamdyq baqylaýdy keńeıtý syndy aýqymdy máselerdi qamtıdy. Sonyń biri densaýlyq saqtaý salasynda joǵarydaǵydaı keleńsizdikterdiń aldyn alýǵa baǵyttalǵan jumystardyń júrgizilýi.
«Qyzyl dálizdiń» kómegi
Elordadaǵy №2 qalalyq aýrýhana – joǵary mamandandyrylǵan medısınalyq kómek kórsetetin 360 oryndyq kópbeıindi stasıonar. Iаǵnı túrli profıldi mamandardy shoǵyrlandyrǵan jedel dıagnostıkalaý men pasıentterge joǵary deńgeıde medısınalyq kómek kórsetýde bar jabdyǵy men jaıy saı klınıkanyń biri. №2 qalalyq aýrýhananyń bas dárigeri Ivan Lı «Astana – adaldyq alańy» jobasy aıasynda jýrnalısterge ádettegiden ózgeshe «Qabyldaý bólmelerin» tanystyrdy.
Qabyldaý bólmeleri birneshe dálizge jiktelipti. Eń jedeli – «Jedel járdem» kómegi arqyly asa shuǵyl túrde jetkiziletin aýyr haldegi naýqastar úshin arnaıy jabdyqtalǵan, birneshe qyzyl perdeli boksqa bólingen «Qyzyl dáliz». Búginde medısınaǵa engizilgen sıfrlandyrýdyń nátıjesinde «Jedel járdem» dárigerleri pasıenttiń jaǵdaıyn aýrýhanaǵa jetpeı turyp habarlaý múmkindigine ıe bolǵan. Aýyrǵan jannyń JSN arqyly onyń boıynda qandaı sozylmaly syrqaty barlyǵy, qandaı dárige allergııa beretini, qysqasy aǵzasyndaǵy aýrýlarynyń deregi kompıýterde saqtalady. Al aýrýhana dıspetcherleri kóliktiń qaı mańda kele jatqanyn kórip, qandaı mamandardyń qajettigin naqtylap, pasıent «Qabyldaý bólimine» jetpesten buryn, dárigerlerdi saqadaı saı daıyndap qoıady. О́ıtkeni mundaı sátte sekýndtardyń óziniń atqaratyn róli bar. Al «Qyzyl dálizdi qabyldaý bólimi» jabdyqtalýy jóninen álemdik ozyq klınıkalardan esh kem emes. Júrek jáne qan tamyrlary, ókpe júıeleri jumysyn atqara almaı jatqanda ony almastyratyn arnaıy apparattarmen, tipti qajet bolsa ota ústeli bolyp ketetin jyljymaly tósek, ýltradybystyq zertteý, júrek soǵysyn jazý syndy tolyp jatqan basqa da kerekti qondyrǵylarmen jabdyqtalǵan bokstardaǵy sıfrly álem dertti janǵa túrli kómek kórsetedi. «Sary dáliz» qyzylǵa qaraǵanda jeńildeý bolǵanymen, pasıenttiń janyna batyp, jedel stasıonarlyq kómek kórsetýdi talap etetin aýrýlardy qabyldaıdy. Bul jerde de kelgen aýrý aınaǵa túsý, qan tapsyrý, áldeqalaı qajetti anyqtaýlardan ótý barysynda aýrýhanany sharlamaıdy. Barlyǵy «Jedel járdem» qaldyrǵannan keıingi tósektiń ústinde jasalady.
Sondaı-aq «Jasyl dáliz» josparly túrde emdeletinderdi qabyldaıtyn bólim. Munda kelýshi elektrondy dúńgirshekten kezek túbirtegin alyp, tablodan ózine tıesili sannyń janýyn kútedi, ári qaraı qajetti stasıonarlyq bólimge jatqyzylady.
QR kod – tutynýshyǵa kómek
Jýyrda Memlekettik qyzmet isteri jáne sybaılas jemqorlyqqa qarsy is-qımyl agenttiginde elordalyq aýrýhanalardyń qyzmet kórsetý deńgeıin kóterý boıynsha ótkizgen brıfıngte keıbir medısınalyq mekemelerdiń palatalary men qabyldaý bólimshelerinde emdelýshilerdi qabyldaý prosedýrasynyń naqty erejesiniń joqtyǵy, kezekte 1 jáne 2 saǵattan artyq kútý faktileri kezdesetini, stasıonarlyq emdeýde palatalardyń jóndeý jumystaryn júrgizýdi, sondaı-aq terezelerin aýystyrýdy qajet etetini aıtylǵan. Joba keńsesiniń jetekshisi Jazıra Jylqyshıeva Qoǵamdyq densaýlyq saqtaý basqarmasymen birlesip, turǵyndarǵa túsinikti ári qoljetimdi túrde sıfrly, qaǵaz jáne aýdıo-vızýaldy formatta algorıtm jasaqtaý qolǵa alynatyndyǵyn atap ótken bolatyn.
Sondaı-aq atalǵan jıynda Astana qalalyq Qoǵamdyq densaýlyq saqtaý basqarmasynyń basshysy Kamaljan Nadyrov joba sheńberinde júzege asyrylǵan jańashyldyq úlgileri týraly baıandaǵan. Onyń aıtýynsha, bıyl aqpan aıynan bastap emhanalardyń bas dárigerleriniń halyqqa atqarylǵan jumystar týraly aı saıyn esep berýi júrgiziledi. Osylaısha, emhanalardyń bas dárigerleri emhanaǵa tirkelgen turǵyndarmen tyǵyz qarym-qatynas ornatyp, máseleni «qajetti jerde jáne jedel kómek kórsetý» qaǵıdaty boıynsha sheshedi jáne árbir emdeý mekemesinde arnaıy QR kod ornalastyryldy. Onda qolynda gadjeti, smartfony bar ár adam skanerden ótkizý arqyly saýalnamaǵa ótip medısınalyq uıymnyń jumysyn, «Smart-Astana» mobıldi qosymshasy arqyly ózine kórsetilgen kómek pen aýrýhananyń qyzmet sapasyna qatysty pikirin jane óz baǵasyn beredi. QR kodtardyń endi bir paıdaly jeri jalǵan eńbekke jaramsyzdyq týraly anyqtama berýdiń jolyn kesýi. Kamaljan Nadyrovtyń aıtýynsha, budan bylaı medısınalyq uıymdarda eńbekke jaramsyzdyq paraǵynyń zańdylyǵyn tekserý úshin «Smart-Astana» mobıldi qosymshasynda aqparattyq qyzmetke qosa blanktegi QR kodtyń bolýy onyń jalǵan emestiginiń dáleli bolmaq. «Osylaısha, jumys berýshi berilgen medısınalyq qujattyń shynaıylyǵyn derbes teksere alady», dedi K.Nadyrov.
Sıfrly júıe ýaqytqa únem
Sıfrly júıeniń ýaqytqa qansha únem ekenine Astana qalasynyń Narkologııa jáne psıhoterapııa ortalyǵy men qalalyq №4, 8 emhanalarǵa barǵanda kózimiz jetti.
Elimizdegi narkologııalyq beıindegi uıymdardyń úzdigi sanalatyn ortalyqtyń joǵary bilikti mamandary, dárigerler, psıhoterapevter, psıhologtar maskúnemdik, nashaqorlyq pen toksıkomanııaǵa, oıynqumarlyqqa shaldyqqan naýqastarǵa tıimdi mamandandyrylǵan kómek kórsetýde sıfrly júıeni keńinen paıdalanady. Qan quramynda qanshalyqty zııandy zattyń bar ekenin anyqtap, ony naqty tanyp, atyn atap berýge kómektesetin arnaıy kitaphanasy bar zerthana qondyrǵysy zamanaýı sıfrly tehnologııaǵa negizdelgen. Kitaphana júıe ishindegi baǵdarlama ekenin aıta ketken jón. Emhanalardaǵy sıfrlandyrý kómegine súıengen jańalyqtar dárigerge de, pasıentterge de qolaıly. Aldymen tirkeý bóliminiń aldyndaǵy sarylǵan kezekti joıý, dárigerge jazylýda arnaıy qosymshalardy paıdalaný, onyń ústine emhananyń kireberisine qoıylǵan tabloǵa JSN arqyly esh qıyndyqsyz qajetti mamanǵa jazylý osydan birneshe jyl buryn aıtylǵanda ertek tárizdi estiletin. Al qazir bári iske asyrylýda.
№4 emhanada QR-kod pen jabdyqtalǵan medısınalyq bilezigi bar pasıentke jolyqtyq. Qant dıabeti jáne arterııalyq gıpertenzııamen aýyratyn pasıent bilezik taqqaly dárigermen aradaǵy baılanystyń jaqsarǵanyn jetkizdi. Dárigerler QR-kod arqyly syrqat jan týraly aqparat alyp, onyń jaǵdaıyna qaraı emine ózgerister engizýge múmkindik alsa, naýqastyń týystary eger pasıentke bir jaǵdaı týsa onyń jaǵdaıy týraly lezde habarlama alady eken. Bul, ásirese naýqas tilden aırylyp qalǵan kezde óte mańyzdy. «Statıstıka boıynsha qabyldaý bólimine kún saıyn 500 naýqas es-tússiz túsedi. Osyndaı ýaqytta qolynda bilezigi bar naýqas jaıynda dárigerler barynsha tolyq aqparat alady. Bul adam ómiriniń saqtalýy jáne dárigerdiń tez jáne naqty kómek kórsetýine jol ashylýy der edik. Qolynda bilezigi bar ár naýqastyń «jeke kabıneti» bar jáne onda pasıent óziniń fotosyn, ózge baılanys aqparattaryn ózgerte alady», deıdi emhananyń bas dárigeri Serik Shaımerdenov.
Qysqasy, sıfrly júıe pasıentke kómekke keldi, ári barlyq medısınalyq qyzmettiń ashyq kórsetilýine jol ashyp otyr.
Anar TО́LEÝHANQYZY,
«Egemen Qazaqstan»