Búgin Úkimet otyrysynda Eńbek jáne halyqty áleýmettik qorǵaý vıse-mınıstri Svetlana Jaqypova áleýmettik tólemderdiń parametrlerin qaıta qaraý boıynsha jumys júrgizilip jatqanyn jetkizdi.
«Qazirgi tańda áleýmettik saqtandyrý júıesinde áleýmettik qaterdiń úsh túri boıynsha parametrlerdi qaıta qaraý usynylady. Olar: eńbek etý qabiletin joǵaltý, asyraýshysynan jáne jumysynan aıyrylý jaǵdaılaryna tólenetin áleýmettik tólemder. Áleýmettik tólemderdiń mólsheri mindetti áleýmettik saqtandyrý júıesine qatysý ótiline baılanysty belgilenedi», dedi S.Jaqypova.
Vıse-mınıstrdiń sózine súıensek, mundaı qadam áleýmettik qater týyndaǵan kezde azamattardyń áleýmettik saqtandyrý deńgeıin arttyrýǵa múmkindik beredi, sondaı-aq azamattardyń mindetti áleýmettik saqtandyrý júıesine qatysýǵa yntalandyrýdy, eńbek qatynastaryn formalızasııalaýdy qamtamasyz etedi. Sonymen qatar S.Jaqypova múmkindigi shekteýli adamdardyń ómir súrý sapasyn jaqsartý jáne quqyqtaryn qamtamasyz etý jónindegi 2025 jylǵa deıingi ulttyq jospardy ázirleý barysymen tanystyrdy.
«Ulttyq jospar múgedektigi bar adamdardy qoǵamǵa tolyq ıntegrasııalaý úshin jaǵdaılar jasaýǵa arnalǵan keshendi jáne vedomstvoaralyq tásildi qamtamasyz etýge tıis. Múgedektigi bar adamdardyń ómir súrý sapasyn jaqsartý jáne quqyǵyn qamtamasyz etý boıynsha jeti basym baǵyt belgilendi», dedi vıse-mınıstr. Atalǵan Ulttyq jospar jobasy 2019 jylǵy mamyr aıynda engiziledi.