AIBA-ny aıyptap Halyqaralyq Olımpıada komıtetine domalaq aryz jazǵandar qazaqstandyqtar bolýy múmkin. Mundaı málimdemeni Halyqaralyq boks assosıasııanyń (AIBA) ókilderi jasady.
Taıaýda Ystambulda Halyqaralyq boks assosıasııanyń (AIBA) jıyny ótip, uıymǵa qatysty birqatar máseleler talqylanǵan-dy. Is-sharada uıymǵa kiretin Ulttyq boks federasııalarynyń arasynda irikti salyp, AIBA-nyń abyroıyna nuqsan keltirgen hatty tekserý máselesi qaralǵan.
Halyqaralyq boks assosıasııanyń málimetine súıensek, HOK-ke hat jazǵan Qazaqstan azamattary eken. Jıynda osy máseleni túbegeıli zerttep, shara qabyldaý qajettigi aıtylǵan.
Uıymnyń resmı saıttarynda Halyqaralyq Olımpıada komıtetine (IOC) jazylǵan hattyń úlgisin jarııalady. Onda belsendi top AIBA-ny aıyptap, 2020 jylǵy Olımpıada oıyndaryndaǵy boks básekesin uıymdastyrýǵa ázir ekenin málimdegen. Hatqa eshkim qol qoımaǵan. Alaıda AIBA domalaq aryzdy jazǵan qazaqstandyqtar dep otyr.
Washington Post gazetiniń habarlaýynsha, byltyr ózbekstandyq Gafýr Rahımov AIBA prezıdenti retinde saılanǵaly beri IOC pen AIBA arasyndaǵy qarym-qatynas ýshyǵyp ketken. Esterińizde bolsa, atalǵan laýazymǵa jerlesimiz Serik Qonaqbaev ta talasqan bolatyn.
Washington Post basylymynyń málimetine súıensek, AQSh-tyń Qarjy mınıstrligi G.Rahımovty esirtki tasýmen, qylmys uıymdastyrýmen aınalysty dep aıyptady. Alaıda ózbekstandyq bıznesmen onyń bárin joqqa shyǵaryp otyr.
Qazirgi tańda AIBA 2020 jylǵy Olımpıada oıyndar uıymdastyrýǵa atsalysýǵa tyıym salynǵan. Maýsymda IOC-tyń kezekti jıynynda AIBA-nyń bolashaǵyna qatysy sheshim qabyldanady.
The Associated Press agenttigine habarlaýynsha, Qazaqstandaǵy bokstyń aınalasynda júrgen bir azamat hattyń shynaıy ekenin aıtqan. Alaıda ol óziniń esimin jarııalamaýdy suraǵan eken.
Osy máselege qatysty «Egemen Qazaqstan» gazeti Qazaqstan boks federasııasyna habarlasqan bolatyn. Federasııa ókilderi bul máseleden habardar ekenin aıtyp, aldaǵy ýaqytta arnaıy málimdeme jasaıtynyn jetkizdi.