Aqmola oblysynyń óńirlik kommýnıkasııalar qyzmetinde kópbalaly jáne turmysy tómen otbasylarǵa memlekettik kómek kórsetý taqyrybynda baspasóz máslıhaty bolyp ótti. Brıfıngke oblystyq jumyspen qamtý ján áleýmettik baǵdarlamalardy úılestirý basqarmasynyń basshysy Dına Ahmetjanova, oblystyq eńbek, áleýmettik qorǵaý jáne kóshi qon departamenti dırektorynyń orynbasary Nazıpa Sálingereeva, oblystyq bilim basqarmasynyń bólim basshysy Ásemgúl Súleımenova qatysyp, jýrnalısterdiń suraqtaryna jaýap berdi.
Aqmola oblystyq bilim basqarmasynyń bólim jetekshisi Ásemgúl Súleımenovanyń aıtýynsha oblysynda 555 mekteptiń 479-y ystyq tamaqpen qamtamasyz etildi. Qańtar aıyndaǵy kórsetkishke súıensek, oblys boıynsha 120 myń bala bilim alýda. Onyń 116 myńy ystyq tamaqpen qamtylǵan. Jergilikti atqarýshy organdar áleýmettik jaǵynan qorǵalmaǵan otbasylardan shyqqan balalardy tegin tamaqpen júz paıyz qamtamasyz etedi. Oblys boıynsha 12745 bala tegin tamaqtanady.
Jıyn barysynda jýrnalıster tarapynan kópbalaly jáne áleýmettik áljýaz otbasylar úshin 2019 jylǵy ózgerister týraly suraqtar qoıyldy. Aqmola oblysynda osy maqsatta arnaıy jumys toptary qurylýda, oǵan partııa ókilderi, depýtattar, kásipkerler kiredi. Olar áleýmettik jaǵynan áljýaz otbasylar boıynsha barlyq aqparatty jınap, taldaıdy. Mysaly, turǵyn úı, balalardy balabaqshaǵa ornalastyrý, jeńildiktermen, jumyspen qamtamasyz etý máseleleri. Taldaý qorytyndysy boıynsha árbir otbasyna áleýmettik karta ázirlenedi. Bul áleýmettik jaǵdaıy qıyn otbasylardy qoldaýǵa kómektesedi.
Jıynda oblystyq jumyspen qamtý jáne áleýmettik baǵdarlamalardy úılestirý basqarmasynyń jetekshisi Dına Ahmetjanova sóz sóılep, kóptiń kókeıinde júrgen kókeıtesti máselelerdi ortaǵa saldy. – Biz az qamtylǵan jáne kópbalaly otbasylarǵa tekserý júrgizemiz, bul ispen 124 assıstent jáne 21 keńesshi aınalysady. Aýyldyq okrýgterde áleýmettik karta bar. Aýyldyq okrýg ákimderi kartany adam sanyna baılanysty toltyrady. Oryn alǵan sońǵy oqıǵalardan keıin biz qaıtadan zertteý júrgizemiz. Kim turǵyn úıge muqtaj, bala baqshasyna ornalastyrý, kimge áleýmettik turǵyda basqa da kómekter kerektigin anyqtaımyz. Otbasylarǵa kómek qolyn sozǵysy keletin demeýshilerdi de izdeıtin bolamyz. Mundaı parametrler áleýmettik kartada belgilengen.
Búgingi kúni Aqmola oblysynda 5306 kóp balaly otbasy, 12 myń az qamtylǵan otbasy turady. Aıta ketý kerek, bıylǵy jyly eki aýdanda – Astrahan jáne Jaqsy aýdandarynda – pılottyq rejımde ataýly áleýmettik kómek basqasha kórsetiledi. Dálirek aıtsaq, kómek jeke qosalqy sharýashylyqtan túsken tabys esebinsiz jasalatyn bolady. Demek, áleýmettik járdem alýshylar, ásirese, aýyldarda áldeqaıda kóp bolady.
Spıkerler eńbek jáne halyqty áleýmettik qorǵaý Mınıstrligine az qamtylǵan jáne kóp balaly otbasylardyń ómir súrý sapasyn jaqsartý boıynsha usynystar joldanǵandyǵyn tilge tıek etti. Aqmola oblystyq eńbek, áleýmettik qorǵaý jáne kóshi-qon departamenti jetekshisiniń orynbasary Názıpa Sálimgereevanyń aıtýynsha, 2019 jyldyń qańtar aıyndaǵy kórsetkish boıynsha 5 306 kóp balaly otbasyǵa aı saıyn 10504 teńge kóleminde járdemaqy tólenedi. Sondaı-aq, bizde kóp balaly analar sanaty bar, jyl basyndaǵy esep boıynsha olardyń sany 7 myńǵa jýyq, járdemaqy mólsheri 16 160 teńgeni quraıdy.
Baıqal BAIÁDIL,
«Egemen Qazaqstan»
Aqmola oblysy