Aqmola oblystyq «Nur Otan» partııasynyń fılıaly Qazaqstan halqy Aqmola Assambleıasymen birlesip, Dostyq úıinde «Ardagerlerdi ardaqtaıyq!» partııalyq jobasy aıasynda uzaq jasaýdyń belsendi ortalyǵyn ashty. Ortalyqtyń maqsaty qart adamdardyń bos ýaqyttaryn úılestirý jáne urpaq sabaqtastyǵyn qalyptastyrýǵa baǵyttalǵan jumystardy uıymdastyrý bolyp tabylady.
Búgingi tańda óńirde 112 myńnan astam zeınetker bolsa, oblys ortalyǵy Kókshetaý qalasynda 26 565 ardager turyp jatyr. Ortalyq arqyly qart adamdardyń ómir súrý sapasyn arttyp, olardyń bos ýaqytyn tıimdi ótkizýge jaǵdaı jasalmaq. Sondaı-aq, munda zeınet jasyndaǵy adamdardy salaýatty ómir saltyn ustanýǵa, kompıýterlik bilimderin arttyrýǵa, qazaq tilin úırenýge, psıhologııalyq, zańgerlik kómek alýǵa múmkindik jasalatyn arnaıy klýbtar ashylady.
Búgingi kúni oblysta ardagerlerdiń bos ýaqyt mándi ótkizýine baǵyttalǵan 40-tan astam klýb jumys isteıdi. Bulardyń qataryndaǵy «Rodnık» mádenı ortalyǵynyń, qalalyq ardagerler keńesi janynan ashylǵan shahmat-doıby klýbynyń, otbasylyq «Altyn jas» klýbynyń, Dostyq úıi janyndaǵy etnomádenı ortalyqtardyń jáne basqa múddeler boıynsha jumys isteıtin úıirmelerdiń belsendi qyzmetin atap ótýge bolady.
Baıqal BAIÁDIL,
«Egemen Qazaqstan»
Aqmola oblysy