О́ńirde «Salamatty Ana men Bala» aılyq-aksııasy jalǵasýda. Oblystyq Densaýlyq saqtaý basqarmasy baspasóz qyzmetiniń habarlaýynsha, 7 kún ishinde 1200 kópbalaly otbasy (myńǵa jýyǵy - ana, 2999-i – bala) tekserýden ótip, dárigerden keńes alypty.
Aılyq aıasynda medbıkeler, áleýmettik qyzmetkerler men medısınalyq uıymdardyń psıhologtary úıdi-úıdi aralap, kópbalaly otbasylardyń densaýlyqtaryn tekserýde. «Áıeldiń bir mindeti – ómirge urpaq ákelý. Biraq dúnıege bala ákelý ońaı ma? Kóp kúsh-jiger jumsaımyz, densaýlyǵymyz álsireıdi. Bala-bala dep júrip keıde ózimizdiń densaýlyǵymyzdy qaraýǵa ýaqytymyzdyń bolmaı ketetini ras. Dárigerler bizdiń úıge de kep balalardy kórip ketti, ózim emhanaǵa bardym», - deıdi Kókpekti aýylynyń turǵyny, 7 balanyń anasy Aınur Nurpeıisova.
Aksııa aıasyndaǵy bir aptada 1 myń anadan 375 tynys alý organdary men gınekologııalyq dert belgileri anyqtalypty. Balalar arasynda tynys organdary aýrýlary 52 prosentti qurapty. Olarǵa ambýlatorlyq jáne stasıonarlyq em taǵaıyndalypty.
Esterińizge sala keteıik, «Salamatty Ana men Bala» aılyq-aksııasy oblysta 12 aqpanda bastalǵan bolatyn. 12 naýryzǵa deıin jalǵasatyn aksııa aıasynda tórt jáne odan kóp balalary bar otbasylardyń músheleri turǵylyqty jerleri boıynsha dıspanserlik jáne aldyn alý tekserýlerinen ótip, konsýltasııalyq kómekter alady.
Azamat QASYM,
«Egemen Qazaqstan»
Shyǵys Qazaqstan oblysy