Qaraǵandy oblysynda tótenshe jaǵdaılar jónindegi departamenttiń bastamasy boıynsha az qamtylǵan otbasylardyń jer úılerine ýly gaz habarshylary (datchıkter) tegin ornatyla bastady.
Ázirge 40 úıge habarshy qoıyldy. Bul qurylǵylardy satyp alýǵa Qyzyl jarty aı qoǵamdyq birlestigi men «Atameken» ulttyq kásipkerler palatasy qol ushyn bergen. TJ departamentindegiler habarlaǵandaı, ýly gaz habarshysyn satyp alýǵa mesenattardy jumyldyrý isi aldaǵy ýaqytta da jalǵasyn tappaq.
– Bul datchıkter aýada ýly gaz taralsa, dybystyq sıgnal bere bastaıdy. Olar tek jeke úılerdiń turǵyndaryna ǵana emes, sonymen qatar kópqabatty úılerde turatyn adamdar úshin de paıdaly, – deıdi TJ departamentiniń baspasóz hatshysy Janna Dáýrenbekova.
Qaırat ÁBILDA,
«Egemen Qazaqstan»
Qaraǵandy