«Ákim bol, halqyńa jaqyn bol» deıdi qazaq danalyǵy. Elmen etene eńbek etip, áleýmettiń áleýetin arttyrýǵa kúsh salý ákimderdiń mindeti. Aýyl ahýalyn arttyrý búgingi tańdaǵy ózekti másele bolǵandyqtan, bul turǵyda berekeli istiń bastaýy bolǵan aýyldar da bar. Ásirese alys aýyldardaǵy ahýaldyń durystalyp kele jatqany qalyń buqarany qýantpaı qoımaıdy. Jambyl oblysy, Shý aýdany, Balýan Sholaq aýyldyq okrýgi oblys ortalyǵynan júzdegen shaqyrym qashyqtyqta jatyr.Dese de, aýylda talaı jyldan beri sheshilmeı kele jatqan máseleler búginde oń sheshimin taýyp, turǵyndardyń tilegi oryndalyp keledi.
Aýyldyq okrýg ákimi Naıman Sultanbaevtyń aıtýynsha, Elbasynyń «Týǵan jerge týyńdy tik!» baǵdarlamasy sheńberinde aýylda talaı tirlik tyndyrylǵan. Kásipkerlerdiń demeýshiligimen soǵys ardageri Temirbek Qalyqovtyń úıine arnaıy jýyný bólmesin jasap beredi. Bul iske búginde Almaty qalasynda turatyn aýyl túlekteri Sábıt Ospanov pen Ánýar Omarbekov syndy azamattar qoldaý kórsetedi. «Temirbek Qalyqov atamyzdan
bata alýǵa barǵanymda, ol kisiniń ásirese qystyń kúni dalaǵa shyǵýy qıyndap ketkenin kórdim. Sondyqtan osyndaı oı keldi», deıdi aýyl ákimi.
Okrýg ortalyǵy Kóktóbe aýylynda buryn-sońdy bolmaǵan arka máselesi ońdy sheshilip, eldi mekenge kire beris tusqa barys beınesi beınelengen eskertkish qoıylǵan. Turǵyndar bul tirlikte de aýyl ákimi qazyna qarjysyna qaramaı, demeýshilerdiń kómegimen jumystyń júıesin tapqan. Budan bólek, ákimniń bastamasymen aýdanǵa qarasty birde-bir aýyldyq okrýgte joq eldi mekenniń tólqujaty kire beris tusqa ilingen.
Aýylda gaz ben saıabaq máselesi kúni búginge deıin ózekti bolyp kelipti. Alaıda arada kóp ýaqyt ótpeı Kóktóbe aýylynan sáni men saltanaty kelisken saıabaq buqaraǵa esigin aıqara ashyp, kógildir otynǵa da halyq qol jetkizedi. Saıabaqqa demeýshilik kórsetken aýyldan shyqqan Úsenbaevtar áýleti eken. «Aýyldaǵy mádenıet úıi kúrdeli jóndeýden ótip, shaǵyn fýtbol alańshalary men medısınalyq ortalyqtar ashylyp, poshta qyzmeti de retke qoıylǵan», deıdi aýyl turǵyndary.
Aýylda jyl saıyn Birlik kúni merekesine oraı, kásipkerlerdiń demeýshiligimen okrýgten shyqqan az qamtylǵan otbasylardyń balalaryn, múmkindigi shekteýli jandardyń, ardagerler men ózge ult ókilderiniń basyn qosyp, «Táýelsiz Qazaqstan – dostyq mekeni» atty Astana qalasyna saıahat uıymdastyrylady. Al jylda Jeńis kúni qyrǵyz-qazaq atbegileriniń basy qosylyp, alaman taı, qunan, aýdaryspaq, teńge ilý, qyz qýý, kókpar tartý ádetke aınalǵan. Sondaı-aq, osy kúni soǵystan qaıtpaǵan sarbazdardy eske alýǵa arnalǵan shara ótkizý, ortalyq meshitte as berip, árýaqtarǵa Quran baǵyshtaý da kúni búginge deıin ıgi jalǵasyn tabýda.
Aýylda meshit máselesi de talaı jyldan bergi halyqtyń tilegi bolatyn. Muny eskergen Naıman Kenjehanuly Almatyǵa baryp, aýyldan shyqqan kásipkerlerge eldi mekenniń tynys-tirshiligin baıan etip, buqaranyń tilegin jetkizedi. Kóptiń ishinen kósh bastap shyqqan Matyshevter áýletiniń demeýshiligimen ótken jyly 350 adamǵa arnalǵan meshittiń qazyǵy qaǵylady. Búginde birneshe qabattan turatyn meshitte erler men áıelderge arnalǵan bólek bólme, ashana, jýyný, tipti tynyǵý oryndaryna deıin qamtamasyz etilgen. Bul sharalarǵa qajetti qarjynyń barlyǵyn aýyl turǵyndary bir úıdiń balasyndaı jumyla kóteripti. Al jańa salynǵan meshittiń mańynan orny belgilengen sport kesheniniń qazyǵyn Máskeý Olımpıadasynyń chempıony Jaqsylyq Úshkempirov qaǵady. Al aýyldaǵy oń ózgeristi kórgen 20 jyldyq mektep bitirýshilerdiń atynan Aıtjan Ashımhanov esimdi azamattyń ózi ákimdi izdep kelip, eldi mekenniń kire berisine arka ornatýǵa usynys jasaıdy. Qazir Balýan Sholaq aýylyn betke alǵan jolaýshylardy záýlim de, qazaqy naqyshty arka qarsy alady. Jáne demeýshilerdiń de sany artyp, Áshimhanovtar áýleti zamanaýı sport keshenin salyp berýge nıet bildiredi. Jobalaý-smetalyq qujattary ázirlenip jatqan keshen qurylysy «Jastar jylyna» oraılastyrylmaq. Budan bólek, aýyl týmasy, búginde Almaty qalasynyń turǵyny Nurdan Saǵyndyqovtyń demeýshiligimen «Jastar» saýyqtyrý ortalyǵyn da ashý kózdelýde. Oǵan qajetti jobalaý-smetalyq qujattary daıyndalýda. Munda shashtaraz, naýbaıhana, áleýmettik dúkendermen qatar, balalar men jasóspirimderge arnalǵan túrli oryndar qyzmet kórsetetin bolady. Taǵy bir janǵa jylý beretin nárse, okrýg ortalyǵynan Balýan Sholaq atyndaǵy murajaıdyń da qurylysy qolǵa alynbaq. Bul maqsatta aýyl ákimi Qyzyljar ólkesine arnaıy baryp, aqyn, kompozıtor Balýan Sholaq týraly tyń derekter jınap kelgen. Endi tarıhı tulǵaǵa arnalǵan murajaıdyń lentasy bıyl qıylady dep kútilýde. «Odan bólek, «Jastar jylyna» oraı okrýg ortalyǵynan «Máńgilik El» jastar saıabaǵy da salynady. Onda 12 qanatty kıiz úı tigilip, halyqqa ulttyq sýsyndar usynylyp, altybaqan qurylyp, túrli abattandyrý jumystary da júrgiziledi», deıdi ákim.
Hamıt ESAMAN,
«Egemen Qazagstan»
Jambyl oblysy