Túrkııanyń Antalııa qalasynda ótken matchqa Qazaqstan mynadaı quramda shyqty: Nepogodov, Erlanov, Malyı, Tursynbaı, Mıroshnıchenko, Shomko, Persýh, Nurǵalıev, Fedın, Murtazaev jáne Turysbek.
Básekeniń basynan jerlesterimiz oıyn tizginin qolǵa alǵanymen, olar uzaqqa deıin qarsylastar qaqpasyn dál kózdeı almady. Moldova saýatty qorǵanyp qana qoımaı, ara-tura shabýylǵa da shyqty. Úzilisten keıin jýyrda ǵana ulttyq komandamyzdyń bas bapkeri bolyp taǵaıyndalǵan chehııalyq maman Mıhal Bılek Igor Shaskıı, Marat Bystrov jáne Oralhan О́mirtaevty alańǵa shyǵardy. Bul óte durys sheshim boldy. Kezdesýdiń 61-mınýtta О́mirtaevtyń shirene tepken doby mańdaıshaǵa tıip baryp, qaqpa torynan tabyldy – 1:0. Odan keıin esep ózgergen joq.
Endi Qazaqstan quramasy óziniń kelesi kezdesýlerin 2020 jylǵy Eýropa chempıonatynyń irikteý týrnıri aıasynda ótkizedi. 21 naýryzda bizdiń fýtbolshylar Shotlandııamen sheberlik baıqasady.
Ǵalym SÚLEIMEN,
«Egemen Qazaqstan»