Búgin Astanada QR Indýstrııa jáne ınfraqurylymdyq damý mınıstrligi Avtomobıl joldary komıtetiniń 2018 jyly atqarǵan jumys qorytyndysy men 2019 jyldyń josparlaryn aıqyndaýǵa arnalǵan keńeıtilgen alqa májilisi ótti.
Alqa májilisinde «Nurly jol» memlekettik baǵdarlamasynyń iske asyrylý barysy, avtojol salasynyń 2019 jylǵa josparlanǵan negizgi mindetteri, qurylys sapasyna, respýblıkalyq jáne jergilikti jeli avtojoldaryn jóndeý men kútip ustaýǵa qatysty máseleler talqylandy. Komıtettiń alqa májilisine QR Premer-mınıstriniń birinshi orynbasary Asqar Mamın, Indýstrııa jáne ınfraqurylymdyq damý mınıstri Jeńis Qasymbek, «Qazavtojol» UK» AQ, «Qazaqavtojol» JShS, «Qazjol ǴZI» JShS-ń jáne merdiger uıymdardyń ókilderi qatysty.
Birinshi vıse-mınıstr Roman Sklıar atap ótkendeı, bıyl bólingen qarjyǵa respýblıkalyq mańyzy bar 4,4 myń km avtojol salynady jáne qaıta jańǵyrtylady. Sondaı-aq, 654 km jolda qozǵalysty ashý, 1 600 km joldy jóndeý josparlanyp otyr. 2019 jyly Úkimettik zaım esebinen Avtomobıl joldary komıteti 4 joba boıynsha 553 km avtojolda jumys júrgizedi. Olar: «Qandyaǵash-Maqat» (299 km), «Jetibaı-Jańaózen» (73 km), «Kúrti-Býrylbaıtal» (85 km), «Uzynaǵash-Otar» 2 ýchaske boıynsha (54 km).
«Ortalyq-Shyǵys dálizi boıynsha (905 km) jumys bastalǵaly 643 km jol paıdalanýǵa berildi, bıyl 262 km jolda qurylys jumystary júrgiziledi. Ortalyq-Ońtústik dálizi boıynsha (1 292 km) jumys bastalǵaly beri Almaty-Qapshaǵaı jáne Astana-Qaraǵandy bóliginde 275 km jol paıdalanýǵa berildi. Bıyl dálizdiń qalǵan bóliginde qurylys jumystary júretin bolady (1 017 km)», - dep habarlady Roman Sklıar.
Aqtóbe-Atyraý-Astrahan avtojoly boıynsha Respýblıkalyq bıýdjet esebinen 120 km bolatyn Atyraý-Astrahan jáne Qandyaǵash-Maqat ýchaskelerinde jumystar jalǵasady. Búgingi kúni bul ýchaskeler boıynsha daıyndyq jumystary bastaldy, tehnıka men jumysshylar shoǵyrlandyrylýda.
Alqa májilisinde avtojol salasynyń problemalyq máseleleri boıynsha «BI RoadCostructions» JShS basqarma tóraǵasy Baýyrjan Isabaev pen «Citic» JShS-ń bas dırektory Vý Sıaodýn baıandama jasady. Sondaı-aq, «Qazjol ǴZI» JShS-ń prezıdenti Baǵdat Teltaev avtomobıl joldaryn salý men jańǵyrtý salasyndaǵy jańa tehnologııalar týraly aıtty. Otyrys sońynda naqty tapsyrmalar berildi.