Taıaýda «Agrarlyq nesıe korporasııasy» AQ basqarma tóraǵasy Narmuhan Sarybaevtyń Máskeý qalasyna jumys sapary barysynda Brıansk et kompanııasymen (BEK) qazaqstandyq aýylsharýashylyq taýar óndirýshilerine 5 myń bas aberdın-angýs asyl tuqymdy maldaryn jetkizý týraly kelisimshartqa qol qoıyldy.
Kelisimshart aıasynda barlyq veterınarlyq-karantındik jáne epızootııalyq-profılaktıkalyq is-sharalardy júzege asyrý eskerilgen.
Brıansk et kompanııasy Reseıdegi jetekshi et óndirýshi – «Mırotorg» agroónerkásip holdınginiń quramyna kiredi. BEK-tiń ónimderi joǵary halyqaralyq standarttarǵa sáıkes. Kompanııa maldy genetıkalyq túrlendirilgen qospalardy, antıbıotıkterdi, gormondardy jáne ósýdi tezdetetin qospalardy paıdalanbaı, ózderiniń taza jemshópterimen ósiredi.
Sonymen qatar osy kelisimniń aıasynda bıylǵy kóktemde Aqmola oblysyndaǵy «AiZet Farms» et óńdeý zaýytymen 1000 bas asyl tuqymdy mal jetkizý týraly, «MTS «Jaıma» JShS-men (Pavlodar oblysy) Agrarlyq nesıe korporasııasynyń qaryz alýshylaryna arnalǵan 5 myń iri qara mal basyn osy jazda jetkizý jóninde operatorlyq kelisimsharttarǵa qol qoıylmaq.
Suńǵat ÁLIPBAI,
«Egemen Qazaqstan»