Taran aýdanynyń Tobyl stansasynda kóp balaly Smırnovtar otbasyna «Nurotandyqtardyń» «Baqytty otbasy» jobasynyń sheńberinde kásipker, «BK-Stroıprom» JShS dırektory Sergeı Kım úı satyp áperdi. 5 bala tárbıelep otyrǵan Elena men Andreı osyǵan deıin tozyǵy jetken, jylý ustamaıtyn, elektr jaryǵy da joq lashyq sekildi úıde turatyn. Olar kúnderdiń-kúni jańa úıge kóshemiz dep kútpegen edi. Qýanyshtarynda shek joq.
«Búgin qolym jetip otyrǵan myna tórt bólmeli úıdi mańaılap ótken saıyn «Shirkin, satyp alar múmkindigim bolsa ǵoı!» dep armandap júrýshi edim. Biraq ondaı qarjyny jınaý qolymnan qaıdan kelsin? Minekeı, búgin bizdiń otbasy úshin arman-tilektiń oryndalǵan kúni! Janashyrlarǵa alǵysym sheksiz» deıdi otaǵasy Andreı.
«Bizdiń kompanııa kóp balaly otbasyǵa qol ushyn sozdy. Barlyq kásipkerdi, shaǵyn jáne orta bıznes ókilderin osyndaı kóp balaly otbasylarǵa kómektesýge shaqyrar edim. Qoldaýǵa muqtaj, jaǵdaıy az mundaı shańyraqtar nazardan tys qalmaýy tıis dep esepteımin» dedi úıdiń kiltin tapsyryp turyp seriktestik dırektory Sergeı Kım. Kásipker bul úıdi áp degennen Smırnovtar otbasyna arnap satyp alǵan joq. Partııanyń aýdandyq fılıaly, ákimdik ádiskerleri jáne Tótenshe jaǵdaı bólimi qyzmetkerleri birigip, az qamtylǵan otbasylardyń turǵylyqty jerlerin aralap, saraptama jasaǵan. Qorytyndysynda Smırnovtardyń úıi eń nashar bolyp tanylyp, baspana kiltin osy otbasyǵa berý uıǵarylypty.
Taran aýdanynda jyl basynan 20 aqpanǵa deıin júz otbasyǵa kómek kórsetilgen. Oǵan 826 900 teńge jumsalypty. 86 otbasy azyq-túlik, 6 januıa otyn, 4 úı aqshalaı kómek alǵan. Jergilikti basshylyq bul baǵyttaǵy jumystyń jalǵasyn tabatynyn aıtty.
Eske sala ketsek, Elbasynyń tapsyrmasymen elimizde áleýmettik salany jetildirý boıynsha aýqymdy jumystar júrip jatyr.»Nur Otan» partııasy janynan Balalar quqyǵyn qorǵaý jónindegi respýblıkalyq keńes qurylǵan edi. Sol organnyń josparyna saı aımaqta atqarylyp jatqan jumystardyń bir parasy dep osy Tobyl eldi mekenindegi ıgi sharany ataýǵa bolady.
Názıra JÁRIMBET,
«Egemen Qazaqstan»
Qostanaı