Oblys ortalyǵynda Jastar jylyna oraı uıymdastyrylǵan jańa teatrdyń tuńǵysh qoıylymy bolyp ótti. Tyrnaqaldy týyndy retinde «Armandar kemesi» atty shyǵarma sahnalandy.
Tanymal jas jazýshy Aıgız Baımýhametovtyń «Tastamashy meni, Ana» povesi negizinde alynǵan «Armandar kemesi» atty qoıylymda búgingi qoǵamdaǵy balalardyń áleýmettik máselesi ótkir qamtylǵan. Sanalýan minezder, árqıly taǵdyrlar sıpattalady.
Premerany qazaq tiline aýdaryp, sahnalaǵan rejısser Farhadbek Qanafın. Basty rólderdi Aqan seri atyndaǵy joǵary mádenıet kolledjiniń stýdentteri somdady. Shyǵarmanyń avtorynyń ózi de balalar úıinde tárbıelenipti. Ata-anasynan jastaı aırylǵandyqtan bul taqyryp qalamgerge etene tanys. Bala kezinen kókireginde jınaqtalyp qalǵan zapyrandy qaǵaz betine túsirgen. Shyǵarmadan jetim balalardyń zar-muńy, kóp adamǵa aıta bermeıtin qaıǵy-qasireti, buıyǵy arman, qara shymyldyq tumshalaǵan kezeńdegi júrekterine jaryq sáýle sebezgilegen úmit oty qylań beredi.
Shyǵarmanyń basty keıipkeri Ilııas tul jetim. Ár adamnyń jaryq dúnıedegi eń jaqyny, janashyry, qadirlisi, qamqorshysy aq sútin berip aıalaǵan ardaqty anasy ekendigi belgili. Mine, sondaı-aq, jaqyndary ata-anasynan erte aırylý Ilııasqa óte aýyr tıedi. Taǵdyrdyń salǵanyna shara bar ma? Jetim qalǵan ol baýyrlarymen birge balalar úıinde tárbıelenedi. Balalarǵa ata-analarynyń ystyq mahabatty men qanatty qamqorlyǵy jetispeıdi. Olar soǵan sýsaýy, soǵan yntyzar. Biraq, tildegi tilektiń tirshilikte ońynan oralmaıtyn ýaqyty da bolady. Álemdegi jan bitkenniń bári jetim dese baýyr eti ezilip turmaıdy eken ǵoı. Tipti, balalar úıiniń qyzmetkerleri men tárbılenýshileri tarapynan da qatygezdikke ushyraıdy. Osynyń barlyǵy «Armandar kemesi» atty qoıylymda shynaıy sýrettelgen.
Birden aıta ketý kerek, báz bireýler bul ómirdiń ózinen alynǵan kórinis dese, endi bireýleri otandyq dramatýrgterdiń osy taqyryptaǵy eńbekteri nege sahnalanbaǵan degen pikirlerin aıtýda. Rasynda da, jýyrda qurylǵan «EL jastar» teatrynyń shymyldyǵy otandyq dramatýrgterdiń týyndylarymen ashylǵany jaqsy bolar edi.
Teatr premerasyna belgili jazýshy, jýrnalıst, Reseı Jazýshylar odaǵynyń múshesi, Shaıhzada Babıch atyndaǵy Bashqurtstan Respýblıkasy syılyǵynyń laýreaty, teatr qoıylymyna negiz bolǵan «Tastamashy meni, Ana» povesiniń avtory Aıgız Baımýhametov qatysty.
Bıylǵy Jastar jyly Aqmola oblysy ishki saıasat basqarmasynyń qoldaýymen «Aldaspan-Rýh» qoǵamdyq birlestigi janynan «EL jastar» teatrynyń ashylýy jaǵymdy jańalyq. Tuńǵysh premerasyn Kókshetaý jurtshylyǵynyń nazaryna usynǵan jastar teatrynyń uıymdastyrý isin barsha Kókshetaý jurtshylyǵyna esimi málim rejısser Farhatbek Qanafın men jas teatrtanýshy, Aqan seri atyndaǵy Kókshetaý joǵary mádenıet kolledjiniń oqytýshysy Hákim Hasambaı qolǵa alyp otyr.
Baıqal BAIÁDIL,
«Egemen Qazaqstan»