Qazaqstanda otandyq óndiristegi RT markaly avıasııalyq otynnyń kóterme baǵasy arzandady, dep habarlady «QazMunaıGaz» UK» AQ baspasóz qyzmetinen.
«QazMunaıGaz» Ulttyq kompanııasy» AQ aǵymdaǵy jyldyń aqpan aıynan bastap qazaqstandyq óndiristiń RT markaly avıasııalyq otynyna kóterme baǵa tómendegeni týraly habarlaıdy», - delingen juma kúni taratylǵan habarda.
Habarda túsindirilgendeı, baǵanyń ózgerýi Atyraý jáne Pavlodar munaı óńdeý zaýyttaryn jańǵyrtýdy aıaqtaý aıasynda ashyq tústi munaı ónimderin óndirý jelisiniń keńeıýine negizdelgen.
«Joǵaryda kórsetilgen faktor ishki naryqty el úshin strategııalyq mańyzdy munaı ónimderimen tolyq qamtamasyz etýge jáne baǵasy qymbat ımporttan bas tartýǵa múmkindik berdi», - delingen habarda.
Eske salsaq, buǵan deıni habarlanǵandaı, QR bas prokýrory Qaırat Qojamjarov premer-mınıstr Baqytjan Saǵyntaevtyń atyna jazylǵan saýalynda keltirgen aqparyna sáıkes Astana men Almatydaǵy avıasııalyq otyn baǵasy Londondaǵy, Máskeýdegi, Dýbaı men Gonkongtaǵy baǵadan qymbatyraq.
Ashyq derek kózderiniń aqparynsha, «Gazpromneft», «Rosneft» UK, «Lýkoıl» jáne «Tatneft» Qazaqstandaǵy avıasııalyq kerosındi negizgi ımporttaýshy-kompanııalar bolyp tabylady.