QR Memlekettik qyzmet isteri jáne sybaılas jemqorlyqqa qarsy is-qımyl agenttigi artyq jumys isteý faktilerine qatysty kezekti tekseristiń nátıjesin jarııalady. Bul týraly QazAqparat HAA habarlady.
Memlekettik qyzmet salasyndaǵy baqylaý departamenti dırektorynyń mindetin atqarýshy Mádına Naýryzbektiń aıtýynsha, memlekettik organdarda artyq jumys isteý faktileri qyzmetkerlerdiń jumys sapasy men olardyń densaýlyǵyna keri áserin tıgizedi.
Osyǵan baılanysty arnaıy júıe engizildi. Sonyń negizinde artyq jumys isteıtin memqyzmetkerlerdi anyqtaýǵa múmkindik bar.
«Bıyl qańtar aıynda memlekettik organdarda ústeme jumys faktileri boıynsha «SKÝD» júıesiniń derekterine kezekti taldaý júrgizildi. О́tken jyldyń qyrkúıek jáne jeltoqsan aılarymen salystyrǵanda oń serpin baıqalady. 2018 jyldyń qyrkúıeginde 12 739 saǵat bolsa, jeltoqsanda memorgandarda artyq jumys 4 790 saǵatqa deıin azaıdy.
Al qańtar aıynda atalǵan kórsetkish 1 194 saǵatqa deıin qysqardy», - dedi M.Naýryzbek Astanada ótken baspasóz máslıxatynda.
Onyń aıtýynsha, birqatar memlekettik organda artyq jumys isteý faktileri múldem joıyldy deýge bolady. Sonyń ishinde Indýstrııa jáne ınfraqurylymdyq damý mınıstrligi, Ádilet mınıstrligi, Bilim jáne ǵylym mınıstrligi, Qorǵanys jáne aeroǵarysh ónerkásibi mınıstrligi, Mádenıet jáne sport mınıstrligi bar.
«Qalǵan memlekettik organdarda ústeme jumys faktileriniń aıtarlyqtaı azaıǵany baıqalady. Aımaqtarda da solaı. Sonymen qatar, jekelegen mınıstrlikterde áli de ústeme jumys faktileri bar. Mysaly, Syrtqy ister mınıstrliginde qańtar aıynda 369 saǵat ústeme jumys anyqtaldy. Densaýlyq saqtaý mınıstrliginde 151 saǵat anyqtaldy. Osyǵan baılanysty barlyq memlekettik organǵa tıisti sharalardy qabyldaýǵa qatysty usynystar berildi», - dep atap kórsetti M.Naýryzbek.