Búgin tańǵy saǵat 06:21 shamasynda búkil jurtty dúrliktirgen oqıǵa boldy. Taraz qalasy 9 yqsham aýdanyndaǵy 62-shi úıde jarylys oryn alyp, kópqabatty turǵyn úıdiń 1 jáne 3 qabattary opyrylǵan. Málimet boıynsha, oqys oqıǵa 2-shi qabattaǵy 49-shy páterde bolǵan eken. Boljam boıynsha jarylys gaz jabdyqtaryn abaısyz paıdalanýdan shyqqan.
Oryn alǵan qaıǵyly oqıǵaǵa oraı, búgin Memleket basshysynyń tapsyrmasy boıynsha Qazaqstan Respýblıkasy Premer-Mınıstriniń orynbasary Jeńis Qasymbektiń tóraǵalyǵymen Úkimet komıssııasy quryldy. Búgin komıssııa tóraǵasy Jeńis Qasymbek jáne komıssııa músheleri, sonymen qatar, Astana qalasynda issaparda júrgen Jambyl oblysynyń ákimi Asqar Myrzahmetov Taraz qalasyna shuǵyl ushyp kelip, oqıǵa ornyna bardy. Oryn alǵan oqıǵanyń anyq-qanyǵymen tanysyp, jarylystan japa shekken azamattardyń jaǵdaıyn surap, qaza tapqandardyń jaqyndaryna kóńil aıtty.
Búgin Taraz qalasynda Úkimet basshysynyń orynbasary Jeńis Qasymbektiń tóraǵalyǵymen komıssııa otyrysy ótti. Oqıǵanyń naqty sebepteri sóz bolǵan jıynda komıssııa tóraǵasy oryn alǵan jaǵdaıdy jan-jaqty zerdeleý kerektigin, sonymen qatar, qajet bolsa arnaıy mamandardy basqa qalalardan aldyrý kerektigin aıtty. Jıyn barysynda Jeńis Qasymbek barlyq zardap shekken turǵyndarǵa jeke-jeke habarlasyp, psıhologııalyq jáne medısınalyq kómek kórsetip, ýaqytsha ornalasatyn páterlermen de qamtamasyz etýdi tapsyrdy.
Jarylystan qaza bolǵan turǵyndardyń otbasyna Taraz qalasy ákimdiginiń tarapynan 1 mıllıon teńgeden qarjylaı kómek beriletin boldy. Komıssııa otyrysynan keıin Jeńis Qasymbek pen Asqar Myrzahmetov aýrýhanaǵa baryp, zardap shekken turǵyndardyń jaǵdaıyn bildi.
Oqıǵaǵa baılanysty Jambyl oblysy ákiminiń tapsyrmasymen oblystyq tótenshe jaǵdaılar departamenti qajetti mamandar men tehnıka jumyldyrdy. Apat oryn alǵan úıdiń barlyq turǵyndary qaýipsiz orynǵa kóshirildi. Oqıǵa barysynda 8 adam zardap shekse, onyń ishinde ókinishke qaraı 3 adam qaıtys bolǵan.
Qazirgi kezde Jambyl oblysynyń ákimdigi zardap shegýshilerge barlyq qajetti kómekterdi kórsetýde. Apat bolǵan úıdiń 100-den astam turǵyndaryna №47 mektepte ystyq tamaq berilip, psıhologııalyq-medısınalyq kómekter kórsetilip jatyr. Sonymen qatar, zardap shegýshiler Taraz qalasyndaǵy «Báıterek» yqsham aýdanyndaǵy kópqabatty bos úılerge de ýaqytsha ornalastyryldy. Al, búgin oryn alǵan tótenshe jaǵdaıǵa baılanysty Jambyl oblysy ákiminiń birinshi orynbasary Bekbolat Orynbekovtiń tóraǵalyǵymen arnaıy jedel shtab quryldy. Taraz qalasynyń ákimi Ǵalymjan Ábdiraıymovtyń ókimimen nysandyq tótenshe jaǵdaı jarııalandy. Jalpy, aldyn-ala saqtyq sharalaryna qala bıýdjetinen 91,5 mıllıon teńge qarastyrylǵan. Al, búgingi oqıǵaǵa baılanysty naqty shyǵyndarǵa taldaý júrgiziledi.
Hamıt ESAMAN,
«Egemen Qazagstan»
Jambyl oblysy